হায়দৰাবাদ, 25 জানুৱাৰীঃ কেন্দ্ৰীয় বাজেটৰ দিন চমু চাপি অহাৰ সময়তে আয়কৰ প্ৰদানকাৰীসকলৰ মাজত ৰেহাইক লৈ অধিক হাহাকাৰময় অৱস্থাৰ সৃষ্টি হৈছে ৷ বিগত বৰ্ষত সাধাৰন নিৰ্বাচনৰ পূৰ্বে, নৰেন্দ্ৰ মোডী নেতৃত্বধীন চৰকাৰে, মধ্যবৰ্গীয় কৰপ্ৰদানকাৰীসকলৰ বাবে আয়কৰ আইনৰ ধাৰা 87A সংশোধন কৰি ৰেহাই বৃদ্ধি কৰিছিল ৷ ইয়াৰ দ্বাৰা 5 লাখ টকাৰ বাৰ্ষিক উপাৰ্জনকাৰীসকলৰ বাবে কৰ ৰেহাই দিয়া হৈছিল ৷ তথাপিও আয়কৰ বিশেষজ্ঞসকলে বিশেষকৈ ৰেহাই আৰু কৰ্তনৰ হাৰত একেবাৰে নিম্ন সম্ভাৱনীয়াৰ পৰিৱৰ্তন হৈ থকা আয়কৰৰ ক্ষেত্ৰত সাধাৰন জনতাৰ বাবে আহিবলগীয়া বাজেটত বিত্তমন্ত্ৰী নিৰ্মলা সীতাৰমনৰ পৰা অধিক ৰেহাই আশা কৰিছে ৷
"মই ভাবো যে, চৰকাৰে, ছেভিংছ একাউন্ট আৰু ফিক্সড ডিপোজিটৰ দৰে সূতৰ আয়ত চৰকাৰে অধিক ৰেহাই প্ৰদান কৰিব ৷" নতুন দিল্লীস্থিত আয়কৰ বিশেষজ্ঞ কেকে মিট্টালে এইদৰে উল্লেখ কৰে ৷ বৰ্তমান সময়ত ছেভিংছ একাউন্ট আৰু ফিক্সড ডিপোজিটৰ দ্বাৰা বছৰি 50 হাজাৰ সূত লাভ কৰা 60 বছৰৰ উৰ্ধৰ জ্যেষ্ঠ নাগৰিকসকলক কৰৰ পৰা বাদ দিয়া হৈছে ৷ অৱশ্যে জ্যেষ্ঠ নাগৰিকক বাদ দি বাকীসকলৰ বাবে 1961 চনৰ আয়কৰ আইনৰ ধাৰা 80 TTAৰ অধীনত বছৰি মাত্ৰ 10 হাজাৰ সূত লাভ কৰাসকলক আয়কৰৰ আওতালৈ অনা হৈছে ৷ এয়া কেৱল ছেভিংছ একাউন্টৰ ক্ষেত্ৰতহে প্ৰযোজ্য হ'ব, অন্যান্যসকলৰ ক্ষেত্ৰত নহয় ৷ "50 হাজাৰ টকাত দিয়া ৰেহাই বয়সক বাদ দি সকলোৰে বাবে বাধ্যতামূলক কৰিব লাগে ৷" ইটিভি ভাৰতৰ আগত এইদৰে উল্লেখ কৰে কেকে মিট্টালে ৷ চৰকাৰে ছেভিংছ একাউন্ট আৰু ফিক্সড ডিপোজিটৰ সূতৰ আয়ৰ ওপৰত থকা পাৰ্থক্য আতৰাই সকলোৰে বাবে সমান কৰিব লাগে বুলিও তেওঁ লগতে উল্লেখ কৰে ৷ তেওঁ বিশ্বাস কৰে যে, গ্ৰাহক মূল্য সূচকাংকৰ তলত থকা সুতৰ আয় ফিক্সড টাৰ্ম ইন্ছট্ৰুমেন্ট, ফিক্সড ডিপোজিটৰ দৰে ক্ষেত্ৰত আয়কৰ ৰেহাই দিয়াটো এক শক্তিশালী পদক্ষেপ হ'ব ৷ "বেছিভাগ ক্ষেত্ৰতে ফিক্সড টাৰ্ম ইন্ছট্ৰুমেন্টৰ বাৰ্ষিক সূতৰ হাৰ 6-7% হোৱাৰ লগতে খুচুৰা মুদ্ৰাস্ফীতি সকলোৰে উৰ্ধত উঠিছে ৷" ছেভিংছ একাউন্ট আৰু ফিক্সড ডিপোজিটৰ পৰা বাস্তৱত আয় নহয় বুলি উল্লেখ কৰি তেওঁ এইদৰে উল্লেখ কৰে ৷