আমেৰিকাত কৰ'ণাৰ বিভিষীকাঃ ২.৫ মিলিয়ন অতিক্ৰম ৰোগীৰ সংখ্যা

বিগত ২৪ ঘণ্টাত আমেৰিকাত কোভিড-১৯ ত আক্ৰান্ত হৈছে প্ৰায় ৫,০০০ গৰাকী লোক। বৰ্তমান ৰাষ্ট্ৰখনত ২৫,০৫,৫৯৩ গৰাকী লোকৰ দেহত কোভিড-১৯ ৰ উপস্থিতি লাভ কৰা গৈছে। আনহাতে, এই মহামাৰীৰ ফলত ১,২৫,৪৮০ গৰাকী ৰোগী মৃত্যুমুখত পৰিছে।

নিউজ ডেস্ক, ২৮ জুনঃ বিশ্বৰ কোভিড-১৯ আক্ৰান্ত ২১৩ খন ৰাষ্ট্ৰ তথা কেন্দ্ৰীয় শাসিত অঞ্চলৰ ভিতৰত আমেৰিকাত সৰ্বাধিক লোক আক্ৰান্ত হৈছে এই ভাইৰাছত। জনছ্ হ'পকিনছ্ বিশ্ববিদ্যালয়ে প্ৰকাশ কৰা তথ্য অনুসৰি আমেৰিকাত ২.৫ মিলিয়ন অতিক্ৰম কৰিছে কোভিড-১৯ আক্ৰান্ত লোকৰ সংখ্যাই ।

ৰাষ্ট্ৰখনত এইপৰ্যন্ত ২৫,০৫,৫৯৩ গৰাকী লোকৰ দেহত কোভিড-১৯ ৰ উপস্থিতি লাভ কৰা গৈছে । ইয়াৰে ৬,৭৯,৩০৮ গৰাকী ৰোগীয়ে আৰোগ্য লাভ কৰাৰ বিপৰীতে এই মহামাৰীৰ ফলত মৃত্যুমুখত পৰিছে ১,২৫,৪৮০ গৰাকী লোক । শনিবাৰৰ দিনটোতে ৰাষ্ট্ৰখনত মুঠ ৪৫,০০০ গৰাকী লোকৰ কোভিড-১৯ পজিটিভ পোৱা গৈছে।

আমেৰিকাৰ পাছতে কোভিড-১৯ত আক্ৰান্ত দেশসমূহৰ ভিতৰত দ্বিতীয় স্থানত ব্ৰাজিল থকাৰ বিপৰীতে তৃতীয় স্থানত আছে ৰাছিয়া । বৰ্তমানলৈকে ব্ৰাজিলত ১৩,১৯,২৭৪ গৰাকী লোক আক্ৰান্ত হোৱাৰ বিপৰীতে মৃত্যুমুখত পৰিছে ৫৭,১৪৯ গৰাকী ৰোগী । আনহাতে, ৰাছিয়াত ৬,৩৪,৪৩৭ গৰাকী লোকৰ কোভিড-১৯ পজিটিভ পোৱা গৈছে আৰু মৃত্যুমুখত পৰিছে ৯,০৭৩ গৰাকী ব্যক্তি । ৰাছিয়াত কোভিড-১৯ আক্ৰান্ত লোকৰ সংখ্যা অধিক যদিও বিশ্বৰ অন্য ৰাষ্ট্ৰৰ তুলনাত মৃত্যুৰ হাৰ বহুত কম ।