চতিয়া, 29 এপ্ৰিলঃ শোণিতপুৰৰ চতিয়া সমষ্টিৰ শ'লগুৰিৰ ৰাষ্ট্ৰীয় ঘাইপথত সংঘটিত হয় এক শোকাৱহ পথ দুৰ্ঘটনা ৷ দুৰ্ঘটনাৰ ফলত কৰুণভাৱে মৃত্যুক আকোৱালী লয় দুগৰাকী মহিলাই । মৃত্যু হোৱা মহিলা দুগৰাকী হ'ল শ'লগুৰি গাঁওৰ জেউতি শইকীয়া (৫০) আৰু বুলু শইকীয়া (৪৭) ।
জামুগুৰিহাটত অচিনাক্ত বাহনৰ খুন্দাত দুগৰাকী মহিলাৰ কৰুণ মৃত্যু
শোণিতপুৰৰ চতিয়া সমষ্টিৰ শ'লগুৰিৰ ৰাষ্ট্ৰীয় ঘাইপথত সংঘটিত হোৱা দুৰ্ঘটনাৰ ফলত কৰুণ মৃত্যুক আকোৱালী লয় জেউতি শইকীয়া আৰু বুলু শইকীয়া নামৰ দুগৰাকী মহিলাই
জামুগুৰিহাটত অচিনাক্ত বাহনৰ খুন্দাত দুগৰাকী মহিলাৰ কৰুণ মৃত্যু
তথ্য অনুসৰি, ১৫ নং ৰাষ্ট্ৰীয় ঘাইপথৰে প্ৰাতঃভ্ৰমণ কৰি থকা অৱস্থাতে তীব্ৰবেগী কোনো গাড়ীয়ে মহতিয়াই লৈ যায় দুয়ো গৰাকী মহিলাক । উক্ত দুৰ্ঘটনাত জেউতি শইকীয়াৰ থিতাতে মৃত্যু হয় যদিও বুলু শইকীয়াক ৰাষ্ট্ৰীয় ঘাইপথৰ দাঁতিত সংকটজনক অৱস্থাত স্থানীয় ৰাইজে উদ্ধাৰ কৰি ধলাইবিলস্থিত উত্তৰ জামুগুৰি চিকিৎসালয়ত ভৰ্তি কৰায় । আহত মহিলা গৰাকীক প্ৰাথমিক চিকিৎসা প্ৰদান কৰা হয় যদিও উন্নত চিকিৎসাৰ বাবে তেজপুৰলৈ প্ৰেৰণ কৰে । কিন্তু, তেজপুৰৰ মিছন হাস্পতালত চিকিৎসাধীন অৱস্থাতে বুলু শইকীয়াৰ মৃত্যু হয় । উল্লেখ্য যে ৰাইজৰ দৃষ্টিগোচৰ নোহোৱাৰ সুযোগ লৈ পলাই সাৰিবলৈ সক্ষম হয় দুৰ্ঘটনা সংঘটিত কৰা গাড়ীখন ।