শিৱসাগৰ,১৫মে': শিৱসাগৰত পথ আৰু দলং নিৰ্মাণত দুৰ্নীতিৰ অভিযোগ ৷ শিৱসাগৰ জিলাৰ ধাইআলিৰ পৰা ধাইবাৰীলৈ যোৱা পথটোত নিৰ্মাণ কৰা হৈছিল এখন দলং। প্ৰায় ৮ কোটি টকাৰে এই দলঙৰ লগতে এটা পকী পথো নিৰ্মাণ কৰা হৈছিল নাজিৰা পথ সংমণ্ডলৰ অন্তৰ্গত আখৈফুটীয়া আৰু চৰগুৱাত। কিন্তু দলং উদ্ধোধনৰ পূৰ্বে পথটোত চিৰাল ফাঁট মেলে। এই পথ নিৰ্মাণৰ দায়িত্বত থকা ঠিকাদাৰ সমুজ্জল বৰুৱা আৰু নিৰ্মাণ প্ৰতিষ্ঠান চাছ ইঞ্জিনিয়াৰ্চে ব্যাপক অনিয়ম সংঘটিত কৰাৰ অভিযোগ উত্থাপন কৰে স্থানীয় ৰাইজে।
উল্লেখ্য যে,দীৰ্ঘ দিনীয়া দাবী-প্ৰতিবাদৰ পাছত ৰাজ্য চৰকাৰে আখৈফুটীয়া আৰু চৰগুৱা পথটো পকীকৰণ কৰা নিৰ্মাণৰ ঠিকা গুৱাহাটীৰ চাছ ইঞ্জিনিয়াৰ্চ নামৰ এটা নিৰ্মাণ প্ৰতিষ্ঠানক আৱন্টন দিছিল ৷ প্ৰায় ৮ কোটি টকাৰ ধন আবন্টন লাভ কৰা ঠিকাদাৰ সমুজ্জল বৰুৱা আৰু পথটোৰ নিৰ্মাণৰ দায়িত্বত থকা অভিযন্ত্ৰা প্ৰতীম বৰুৱাই দিচাং নৈৰ ওপৰত নিৰ্মিত পকী দলং আৰু দলং সংযুক্ত পথ নিৰ্মাণত ব্যাপক অনিয়ম সংঘটিত কৰাৰ অভিযোগ উত্থাপন হৈছে। পথটো উদ্বোধন নোহোৱাতে পথত চিৰাল ফাঁট মেলাৰ লগতে বখলা-বখলে এৰাই যোৱাত তীব্ৰ প্ৰতিক্ৰিয়াৰ সৃষ্টি হয় স্থানীয় ৰাইজৰ মাজত। ইফালে পথ নিৰ্মাণত ঠিকাদাৰ-অভিযন্তাৰ অনিয়মৰ অভিযোগ উত্থাপন কৰা ৰাইজে ৮ মে'ত ঠিকাদাৰী প্ৰতিষ্ঠানৰ লগতে ঠিকাদাৰ-অভিযন্তাৰ বিৰুদ্ধে ডিমৌ আৰক্ষী থানাত এখন এজাহাৰ দাখিল কৰে ৷ কিন্তু এজাহাৰ দাখিলৰ ৮ দিন অতিক্ৰম কৰাৰ পাছতো বৰ্তমানলৈকে ডিমৌ আৰক্ষীয়ে এজাহাৰকাৰীৰ মন্তব্য লিপিবদ্ধ কৰিবলৈ আহৰি নোপোৱাৰ অভিযোগ উত্থাপন কৰিছে এজাহাৰ দাখিল কৰা যদুমনি বৰা নামৰ লোকজনে ৷