পথ দুৰ্ঘটনাৰ বাবে ৩৭ নং ৰাষ্ট্ৰীয় ঘাইপথ অৱৰোধ

জখলাবন্ধাত সংঘটিত হোৱা পথ দুৰ্ঘটনাৰ বাবে ৩৭ নং ৰাষ্ট্ৰীয় ঘাইপথ অৱৰোধ স্থানীয় ৰাইজৰ

নগাঁও,২০ এপ্ৰিল : শুকুৰবাৰে নিশা নগাঁৱৰ জখলাবন্ধাত সংঘটিত হয় এক ভয়ংকৰ পথ দুৰ্ঘটনা । দুৰ্ঘটনাটোত নিহত হয় প্ৰৱীৰ ৰয় নামৰ এজন ব্যৱসায়ী । নিশা নিজ ব্যৱসায় প্ৰতিষ্ঠানৰ পৰা ঘৰলৈ উভতাৰ পথতেই সংঘটিত হয় এই দুৰ্ঘটনাটো । জখলবন্ধা-চিকনী সংযোগী পথটোত চিকনী দিশৰ পৰা অহা এখন তীব্ৰ বেগী ছুইফট ডিজায়াৰ গাড়ীয়ে ব্যৱসায়ীজনক খুন্দিয়াই গুৱাহাটী অভিমুখে পলায়ন কৰে । আনহাতে স্থানীয় ৰাইজে ব্যৱসায়ীজনক চিকিৎসালয়লৈ লৈ যায় যদিও চিকিৎসকে মৃত বুলি ঘোষণা কৰে । এই ঘটনাক কেন্দ্ৰ কৰি শনিবাৰে স্থানীয় ব্যৱসায়ী আৰু ৰাইজে ৩৭ নং ৰাষ্ট্ৰীয় ঘাইপথ অৱৰোধ কৰি জখলাবন্ধাত উত্তেজনাময় পৰিৱেশৰ সৃষ্টি কৰে । অৱশেষত প্ৰতিবাদী ৰাইজক মহকুমা প্ৰশাসন আৰু আৰক্ষীয়ে আশ্বাস প্ৰদান কৰাত প্ৰতিবাদকাৰী শান্ত হয় আৰু পথ অৱৰোধ উঠাই লয় । পথ অৱৰোধৰ বাবে প্ৰায় এঘণ্টা যান-বহন অচল হৈ পৰে ৰাষ্ট্ৰীয় ঘাইপথ । ইতিমধ্যেই আৰক্ষীয়ে ঘটনা সন্দৰ্ভত তদন্ত আৰম্ভ কৰিছে ।

আনহাতে,স্থানীয় ৰাইজৰ অভিযোগ অনুসৰি চৰকাৰী ভূমি বেদখল কৰি জখলবন্ধা-চিকনী সংযোগী পথটো ঠেকাই অনাৰ বাবে সংঘটিত হয় এই ঘটনা । গড়কাপ্তানী বিভাগে পথছোৱা সম্প্ৰসাৰণৰ বাবে কোনো ব্যৱস্থা গ্ৰহণ নকৰাৰ বাবেও ক্ষোভিত হৈ পৰে অঞ্চলবাসী ।