মাৰ্ঘেৰিতা,৮মে' : মঙলবাৰে তিনিচুকীয়া আৰক্ষীয়ে অভিযান চলায় আতক কৰে চুৰীকাণ্ডৰ লগত জড়িত ৩জনকৈ যুৱকক । যুৱককেইজনৰ পৰা আৰক্ষীয়ে উদ্ধাৰ কৰে এটা ইস্ত্ৰি, কেমেৰা, মবাইল ফোন, ঘড়ী,তিনিখনএটিএম কাৰ্ডৰ লগতে চাৰিটা সোণৰ আঙুঠি, দুযোৰ সোণৰ খাৰু,দুডাল সোণৰ চেইন সহ নগদ ধন ৪৪০০ টকা । আৰক্ষীয়ে আতক কৰা ৰাজীৱ ৰেগন,ললিত দাস,কুশল চেতিয়া নামৰ চোৰকেইজনৰ ঘৰ জাগুনত ।
ঘটনা অনুসৰি, দেওবাৰে জাগুনত অনুষ্ঠিত হৈছিল নীল আকাশৰ ৰঙালী বিহুৰ এক অনুষ্ঠান । গৃহস্থই বিহুৰ অনুষ্ঠান উপভোগ কৰাৰ সুযোগ লৈ চোৰকেইজনে দুটাকৈ চুৰিকাণ্ড সংঘটিত কৰে । মহম্মদ আজমিৰ নামৰ যুৱক এজনৰ ম'বাইল দোকানৰ পৰা প্ৰায় এক লাখ টকাৰ ম'বাইল ফোন সহ কেইবা হাজাৰ নগদ ধন লুটি লৈ যায় চোৰকেইজনে । ইফালে, সেই একে নিশাই জাগুনৰ নিবাসী গীতাঞ্জলী চেতিয়াৰ বাসগৃহৰ পৰাও চোৰকেইজনে এটা লোহাৰ আলমাৰি ভাঙি চাৰিতোলা সোণৰ আ-অলংকাৰ সহ নগদ এক লাখ টকা লৈ যায় । ইতিমধ্যেই ঘটনা সন্দৰ্ভত জেৰা অব্যাহত ৰাখিছে আৰক্ষীয়ে ।
