নলবাৰী,২৬ এপ্ৰিল : শুকুৰবাৰে নলবাৰী জিলাত প্ৰতিবাদ সাব্যস্ত কৰে জিলাখনৰ সাংবাদিকসকলে । জিলাখনৰ ৰাজেন ডেকা নামৰ এজন বাতৰি কাকতৰ সাংবাদিকক দূৰ্বৃত্তই নিশাৰ এন্ধাৰৰ সুযোগ লৈ চোকা অস্ত্ৰৰে আক্ৰমণ কৰি প্ৰাণে মৰাৰ চেষ্টা চলোৱাক কেন্দ্ৰ কৰি প্ৰতিবাদত নামে সাংবাদিকসকলে । এই প্ৰতিবাদত সাংবাদিকসকলক সহযোগ কৰে আছু আৰু অসম জাতীয়তাবাদী যুৱ ছাত্ৰ পৰিষদৰ লগতে বহু দল-সংগঠনে । প্ৰতিবাদকাৰীসকলে ঘটনাৰ উচিত তদন্তৰ লগতে দোষীক কঠোৰতম শাস্তি প্ৰদানৰ দাবী জনায় ।
উল্লেখযোগ্য যে ২৩ এপ্ৰিলত বৰক্ষেত্ৰীৰ এটা ভোটগ্ৰহণ কেন্দ্ৰত সৃষ্টি হোৱা উত্তেজনা তথা দূৰ্নীতিৰ বাতৰি প্ৰকাশ পোৱাৰ পিছতে ডেকাৰ ওপৰত বিজেপি সমৰ্থনকাৰীয়ে আক্ৰমণ চলায় । ইপিনে, বিজেপি কৰ্মীয়ে ফেচবুকত বাতৰিটোৰ এটা অশালীন পোষ্ট দি সাংবাদিকগৰাকীক প্ৰাণে মৰাৰ ভাবুকি দিয়াৰ লগতে এই পোষ্টটোত বৰক্ষেত্ৰীৰ বিজেপি সমৰ্থনকাৰীয়ে সাংবাদিকগৰাকীৰ বিৰুদ্ধে নানা কটু বাক্যৰে কমেন্ট কৰে । সাংবাদিকগৰাকীক ফেচবুকত অশালীন মন্তব্য কৰাতে ক্ষান্ত নাথাকি বৃহস্পতিবাৰে কৰ্তব্যৰ পৰা ঘৰলৈ আহি থকা অৱস্থাতে নিশাৰ সুযোগ লৈ সাংবাদিকগৰাকীক আক্ৰমণ কৰে । এই ঘটনাক কেন্দ্ৰ কৰি সমগ্ৰ নলবাৰী জিলাতে প্ৰতিক্ৰিয়াৰ সৃষ্টি হয় ।
আৰু চাবলৈ - মুকালমুৱাত আক্ৰমণৰ বলি সাংবাদিক
