এদিনৰ বাবে বন্ধ থাকিব ৰাজ্যৰ চাহ বাগিচা সমূহ !

অসমৰ চাহ শ্ৰমিক সকলৰ মজুৰি ৩৫১.৩৩ টকালৈ বৃদ্ধি নকৰাৰ ক্ষোভত অখিল ভাৰতীয় চাহ মজদূৰ সংঘ (অসম)ই অহা ৩০ ছেপ্টেম্বৰত ৰাজ্যৰ বাগিচা সমূহৰ শ্ৰমিক সকলক ধৰ্মঘটত বঢ়িবৰ বাবে জনাইছে আহ্বান ।

তেজপুৰ,২৬ ছেপ্টেম্বৰ : অসমৰ চাহ শ্ৰমিক সকলৰ দৈনিক মজুৰি ৩৫১.৩৩ টকালৈ বৃদ্ধি নকৰাৰ বাবে অখিল ভাৰতীয় চাহ মজদূৰ সংঘ (অসম)ই অহা ৩০ ছেপ্টেম্বৰত ৰাজ্যৰ বাগিচা সমূহৰ শ্ৰমিক সকলক ধৰ্মঘটত বঢ়িবৰ বাবে জনাইছে আহ্বান । ২০২১ ৰ বিধান সভা নিৰ্বাচনত অসমৰ চাহ শ্ৰমিকে উত্তৰ দিব শাসকীয় বিজেপিক ৷
শনিবাৰে তেজপুৰত শোণিতপুৰ জাৰ্নেলিষ্ট ইউনিয়নৰ সভা কক্ষত অনুষ্ঠিত এক সংবাদ মেলত অখিল ভাৰতীয় চাহ মজদূৰ সংঘৰ সাধাৰণ সম্পাদক দীনেশ নায়ক আৰু ৰয়েল চৰেঙে এই কথা ঘোষণা কৰে । সংঘই উল্লেখ কৰে, অসমৰ বিজেপি নেতৃত্বাধীন চৰকাৰে প্ৰতিশ্ৰুতি দিছিল যে চাহ শ্ৰমিক সকলক ৩৫০.০০ টকাৰ দৈনিক মাজুৰি প্ৰদানৰ ব্যৱস্থা কৰা হ’ব । কিন্তু চৰকাৰ গঠন হৈ যোৱাৰ পিছতো এই চৰকাৰখনে মজুৰি বৃদ্ধিৰ কোনো ব্যৱস্থা গ্ৰহণ নকৰিলে ৷ চৰকাৰৰ এই মিছা প্ৰতিশ্ৰুতিৰ প্ৰতিবাদত শ্ৰমিক সকলৰ যৌথ সংগ্ৰাম সমিতিয়ে ২০১৮ চনৰ ২০ আগষ্টত পালন কৰিছিল বাগিচা ধৰ্মঘট ৷ এয়াৰ পিছতেই একেটা বছৰতে দৈনিক মজুৰী মাত্ৰ ৩০.০০ টকা বৃদ্ধি কৰিলে যদিও দুমাহৰ মজুৰিৰ পৰা চাহ শ্ৰমিক সকলক বঞ্চিত কৰিছিল বুলি অভিযোগ উত্থাপিত কৰিছে । পৰৱৰ্তী সময়ত ২০১৯ চনতো ৩৫১.৩৩ টকা মজুৰি সন্দৰ্ভত বিজেপি চৰকাৰখনে কোনো ব্যৱস্থা গ্ৰহণ নকৰিলে ।

সংবাদ মেলখনত তেওঁলোকে উল্লেখ কৰে যে, চৰকাৰখনে শ্ৰমিক সকলক দুই ধৰণে প্ৰৱঞ্চনা কৰিলে ; এটা হ'ল ৩৫১.৩৩ টকা মজুৰি দিয়াৰ প্ৰতিশ্ৰুতি আৰু আনটো হল আগতে পাই থকা মজুৰিৰ পৰাও ৩০ টকাকৈ কমাই দিয়া । উল্লেখযোগ্য যে, ১৯৪৮ চনৰ মজুৰি আইন মতে প্রতি ৬ মাহৰ মূৰে মূৰে বস্তুৰ মূল্য বৃদ্ধিৰ লগত সংগতি ৰাখি শ্ৰমিকৰ মজুৰিৰ লগত মৰগীয়া ভাট্ট যোগ দিব লাগে । চাহ বাগিচাত প্ৰতি ৩ বছৰৰ মূৰে মূৰে এক চুক্তিৰ জৰিয়তে মজুৰি বৃদ্ধি কৰাৰ এক নিয়ম চলি আহিছিল ; যত প্ৰত্যেক বছৰৰ ১ জানুৱাৰীৰ পৰা ডিচেম্বৰ লৈ এটা নিৰ্দিষ্ট পৰিমাণ আৰু দুটা বছৰৰ বাবেও বৃদ্ধিৰ পৰিমাণ আগতেই নিৰ্ধাৰণ কৰা হয় বুলি চৰেঙে উল্লেখ কৰে ।
আনহাতে প্রসূতিৰ বাবে ঘোষণা কৰা ১২,০০০ টকাৰ আঁচনিখনো বিফল হোৱা বুলি উল্লেখ কৰিলে সংবাদ মেলখনত। উল্লেখযোগ্য যে, দেশৰ ভিতৰতে অসমৰ চাহ বাগিচা সমূহতেই প্রসূতিৰ মৃত্যুৰ হাৰ সৰ্বাধিক ।

লগতে পঢ়ক: সৰ্বানন্দ সোণোৱালক সৰ্বকালৰ ব‍্যৰ্থ মুখ‍্যমন্ত্ৰী আখ্যা অখিল গগৈৰ