নেশ্যনেল ডেস্ক,১৭ মাৰ্চ:হিমাচলতপ্ৰকৃতি সংৰক্ষণৰ বাবে এইবাৰ ওলাই আহিছে শ শ মহিলা । ৰাজপথ নিৰ্মাণৰ নামত গছ-গছনি কটা কাৰ্যক বিৰোধীতা কৰি ডেৰাডুনৰ কামেদি দেৱী, ৰংথৰা, মাজগাঁও, চৌনালা আদি অঞ্চলৰ মহিলাসকলে প্ৰতিবাদ সাব্যস্ত কৰি আহিছে । এইবাৰ চিপকো আন্দোলন আৰম্ভ কৰিলে জাখনী অঞ্চলৰ মহিলাসকলেও । মহিলাসকলে বৃহৎ আকাৰৰ ওক আদিৰ দৰে গছবোৰক সাৱটি লোৱা দেখিবলৈ পোৱা গৈছে ।
জাখনী গাঁৱৰ গাঁওবুঢ়া কমলা মেহতাৰ নেতৃত্বত মহিলাসকলে এনেদৰে প্ৰকৃতি সংৰক্ষণৰ বাবে ওলাই আহিছে । সমান্তৰালকৈ এক সজাগতামূলক সভাও আয়োজন কৰা হয় য'ত গছৰ সংৰক্ষণৰ প্ৰতিশ্ৰুতি লোৱা হয় । ইয়াৰ পিছতে সকলো মহিলাই গছক সাৱটি ধৰি নিজৰ সন্তানৰ দৰে ৰক্ষা কৰাৰ প্ৰতিজ্ঞা কৰে । তেওঁলোকৰ মতে চৌনালা গাঁৱলৈ পূৰ্বৰে পৰা এটা পথ আছে কিন্তু ইয়াৰ পিছতো পুনৰ ৰংগথৰা পথটো নিৰ্মাণ কৰি থকা হৈছে । এই পথৰ নিৰ্মাণৰ সময়তে তেওঁলোকে বছৰ বছৰ ধৰি সংৰক্ষণ কৰি থকা গছবোৰ কাটি পেলোৱা হৈছে । সেয়ে প্ৰকৃতি ধ্বংস কৰি হোৱা উন্নয়নৰ বিৰোধীতা কৰি যাব বুলি উল্লেখ কৰে মহিলাসকলে ।