নেশ্যনেল ডেস্ক, 5 আগষ্ট :চ’ছিয়েল মিডিয়াত ভাইৰেল হোৱা এটা ভিডিঅ’ ৷ এগৰাকী মহিলাক গুৰুলা গুৰুলকৈ প্ৰহাৰ কৰা হৈছে ভিডিঅ’টোত ৷ কেইবাগৰাকীও পুৰুষ-মহিলাই মিলি নিৰ্দয়ভাৱে প্ৰহাৰ কৰিছে মহিলাগৰাকীক ৷ প্ৰহাৰ সহিব নোৱাৰি প্ৰাণৰ কাতৰেৰে চিঞৰিছে মহিলা গৰাকীয়ে ৷ কিন্তু যিখন দেশত দুৰ্ঘটনাত আহত ব্যক্তিক চিকিৎসালয়লৈ নিয়াৰ পৰিৱৰ্তে ফটো উঠোৱাত মানুহ ব্যস্ত হয়, সেই দেশত জানো সহায় বিচাৰি লাভ আছে ৷
কোনো আগবাঢ়ি নাহিল, মহিলাগৰাকীক বচাবলৈ ৷ মহিলাগৰাকীৰ ওপৰত মানুহখিনিৰ ইমানেই খং যে, কেৱল মাৰ-কিল কৰিয়েই ক্ষান্ত নহ’ল তেওঁলোক ৷ খঙৰ কোবত মহিলাগৰাকীৰ চুলিও খুৰাই দিলে তেওঁলোকে ৷ ইমান নিৰ্দয়তা কেৱল মানুহৰ পক্ষেই সম্ভৱ ৷
আপুনি হয়তো ভাবিছে ক’ত এনেকৈ প্ৰহাৰ কৰিছে মহিলাক ৷ ব’লক ঘটনাৰ আঁতি-গুৰি বিচাৰি বিহাৰলৈ যাওঁ ৷
লগতে চাওক :পৰ্ণগ্ৰাফী গোচৰ: ৰাজ কুন্দ্ৰাৰ জামিন আবেদন নাকচ
ঘটনাৰ স্থান বিহাৰৰ কাটিহাৰ জিলা ৷ এই যে প্ৰহাৰ কৰি থকা মহিলা গৰাকী, তেওঁ সাত বছৰ পূৰ্বে বিবাহপাশত আৱদ্ধ হৈছিল কাটিহাৰৰ মনশাহী থানাৰ অন্তৰ্গত এটা অঞ্চলৰ বাসিন্দা মনোজ নামৰ ব্যক্তিগৰাকীৰ সৈতে ৷ বিয়াৰ পাচত স্বামী-স্ত্ৰীৰ মাজত খুট-খাট লাগেই, সেইটো তেনেই সাধাৰণ কথা ৷ এওঁলোকৰ ক্ষেত্ৰতো ব্যতিক্ৰম নহ’ল ৷ কিন্তু বিয়াৰ দুবছৰ পাচৰ পৰা মহিলাগৰাকীৰ জীৱনলৈ নামি আহিল কালক্ষণ ৷
পত্নীক শাৰিৰীক-মানসিক নিৰ্যাতন চলাবলৈ আৰম্ভ কৰিলে মনোজে ৷ সৰু-সৰু কথাতে পত্নীক প্ৰহাৰ কৰাতো যেন মনোজৰ বাবে হৈ পৰিল অভ্যাস ৷ কিমাননো সহিব মহিলাগৰাকীয়ে ? তেৱোঁ তেজ-মঙহৰেহে গঢ়া ৷ স্বামীগৃহৰ অত্যাচাৰত তিষ্ঠিব নোৱাৰি পিতৃগৃহলৈ পলায়ন কৰে তেওঁ ৷ ইয়াতেই যেন আত্ম সন্মানত আঘাত লাগিল স্বামীগৃহৰ ৷ বিভিন্ন ধৰণে বুজাই মেলি মহিলাগৰাকীক ঘৰলৈ লৈ আহিলে তেওঁলোকে ৷
লগতে চাওক :ভক্তৰ বাবে পুনৰ মুকলি হ'ব পুৰীৰ জগন্নাথ মন্দিৰ
কিন্তু, তাৰ পাচত আৰম্ভ হ’ল আন এক অধ্যায় ৷ স্বামীগৃহলৈ অহাৰ পিছত মহিলাগৰাকীৰ ওপৰত চলিবলৈ ধৰিলে অবৰ্ণনীয় অত্যাচাৰ ৷ এই ঘটনাই ধাৰণ কৰে চূড়ান্ত ৰূপ ৷ প্ৰথমে গুৰুলা-গুৰুলকৈ প্ৰহাৰ কৰা হ’ল মহিলা গৰাকীক ৷ কিন্তু তাতেই শেষ নহ’ল শাস্তি ৷ এডাল গছত বান্ধি প্ৰহাৰ কৰাৰ পিছত মহিলাগৰাকীক চুলি খুৰাই দিয়ে স্বামীগৃহৰ লোকে ৷
কিন্তু কিয় খুৰালে মহিলাগৰাকীৰ চুলি, তাৰ কাৰণ শুনিলে আপুনি আচৰিত হ’ব ৷ যাতে পৰৱৰ্তী সময়ত মহিলাগৰাকী পিতৃগৃহলৈ পলায়ন কৰিব নোৱাৰে তাৰ বাবেই খুৰাই দিলে চুলি ৷
এই ঘটনাৰ খবৰ লাভ কৰি ঘটনাস্থলীত উপস্থিত হয় আৰক্ষী ৷ আৰক্ষীয়ে ঘটনা সংক্ৰান্তত জড়িত থকাৰ অভিযোগত কৰায়ত্ত কৰে চাৰিগৰাকী লোকক ৷ তদুপৰি মহিলাগৰাকীক চুলি খুৰাই দিয়াৰ অপৰাধত গ্ৰেপ্তাৰ কৰে শহুৰ, শাহু আৰু স্বামীক ৷
লগতে চাওকঃউন্নত হৈছে জম্মু-কাশ্মীৰৰ আইন শৃংখলা পৰিস্থিতি: IG CRPF
