দক্ষিণ ত্ৰিপুৰাত ড্ৰাগছৰ বিৰুদ্ধে আৰক্ষীৰ অভিযান

গোপন সূত্ৰৰ তথ্যৰ ভিত্তিত সদৰ এছডিপিঅ’ (SDPO) আৰু আমতলী এছডিপিঅ’ (SDPO)ৰ নেতৃত্বত দুটা দল গঠন কৰা হয় ৷ দুয়ো দলে পৃথকে পৃথকে সমীৰ বণিক নামৰ এজন ব্যক্তিৰ দোকান আৰু বাসগৃহত অভিযান চলাই বৃহৎ পৰিমাণৰ নিচাজাতীয় সামগ্ৰী জব্দ কৰে ৷

আগৰতলা,6 জুন:এক গোপন সূত্ৰৰ তথ্যৰ ভিত্তিত ত্ৰিপুৰা আৰক্ষীয়ে অভিযান চলাই প্ৰায় 75 লাখ টকাৰ নগদ ধন, 13 গ্ৰাম ব্ৰাউন চুগাৰ, 150 য়াবা টেবলেট, 572 গ্ৰাম সোণৰ লগতে 45,000 বাংলাদেশী ধন জব্দ কৰে ৷ সামগ্ৰীখিনি ত্ৰিপুৰাৰ এ ডি নগৰৰ সমীৰ বণিক নামৰ এজন লোকৰ পৰা জব্দ কৰে আৰক্ষীয়ে ৷ সম্প্ৰতি অভিযুক্ত সমীৰ বণিকক জেৰা অব্যাহত ৰাখিছে আৰক্ষীয়ে ৷

অভিযান সন্দৰ্ভত দক্ষিণ ত্ৰিপুৰাৰ অতিৰিক্ত আৰক্ষী অধীক্ষক জগদীশ্বৰ ৰেড্ডীয়ে কয়, ‘গোপন সূত্ৰ তথ্যৰ ভিত্তিত সদৰ এছডিপিঅ’ (SDPO) আৰু আমতলী এছডিপিঅ’ (SDPO)ৰ নেতৃত্বত দুটা দল গঠন কৰা হয় ৷ দুয়ো দলে পৃথকে পৃথকে অভিযুক্ত সমীৰ বণিকৰ বত্তলা বজাৰস্থিত দোকান আৰু এ ডি নগৰৰ বাসগৃহত অভিযান চলায় ৷ প্ৰায় পাঁচ ঘণ্টা জুৰি চলে এই অভিযান ৷

অতিৰিক্ত আৰক্ষী অধীক্ষক গৰাকীয়ে আৰু কয়, এই অভিযানত 30,000 টকা অধিক নিষিদ্ধ কফ চিৰাপ জব্দ কৰা হয় ৷ ড্ৰাগছৰ বিৰুদ্ধে আৰক্ষী কঠোৰ হোৱা বুলিও জনায় জগদীশ্বৰ ৰেড্ডীয়ে ৷ ইয়াৰ উপৰিও এই সমগ্ৰ ঘটনাটো আবকাৰী আৰু এনফ’ৰ্চ ডাইৰক্টৰেও অনুসন্ধান চলাব কাৰণ ইয়াত হাৱালা লেনদেন জড়িত থকাৰ সন্দেহ প্ৰকাশ কৰিছে আৰক্ষীয়ে ৷

লগতে পঢ়ক-বাঁহৰ বিয়েৰ (BAMBOO BEER) প্ৰস্তুত কৰিবলৈ সাজু ত্ৰিপুৰাৰ সমীৰ জামাতিয়া