ভেকচিন ফৰ অলঃ হোৱাটছএপত উপলব্ধ নতুন ষ্টিকাৰ

বুধবাৰে বিশ্ব স্বাস্থ্য সংস্থাৰ সহযোগত 'ভেকচিন ফৰ অল' শীৰ্ষক ষ্টিকাৰ পেক মুকলি কৰিলে ফেচবুকৰ মালিকানাধীন হোৱাটছএপে ।COVID-১৯ প্ৰতিষেধক বিষয়ক তথ্যৰ বাবে চৰকাৰ, আন্তঃৰাষ্ট্ৰীয় সংগঠনৰ সৈতে জনসাধাৰণক সংযোগ কৰাত সহায় আগবঢ়োৱাৰ বাবে হোৱাটছএপে এই নতুন ষ্টিকাৰ মুকলি কৰে ।

নেশ্যনেল ডেস্ক, ৯ এপ্ৰিল: ফেচবুকৰ মালিকানাধীন হোৱাটছএপে মুকলি কৰিলে 'ভেকচিন ফৰ অল' শীৰ্ষক ষ্টিকাৰ পেক । বুধবাৰে বিশ্ব স্বাস্থ্য সংস্থাৰ সহযোগত হোৱাটছএপে এই নতুন ষ্টিকাৰ পেক উন্মোচন কৰে । হোৱাটছএপ কৰ্তৃপক্ষৰ মতে, COVID-১৯ প্ৰতিষেধক বিষয়ক তথ্যৰ বাবে চৰকাৰ, আন্তঃৰাষ্ট্ৰীয় সংগঠনৰ সৈতে জনসাধাৰণক সংযোগ কৰাত সহায় আগবঢ়োৱাৰ বাবে নতুন ষ্টিকাৰ মুকলি কৰা হৈছে ।

COVID-১৯ প্ৰতিষেধকৰ সম্ভাৱনীয়তাক লৈ ব্যৱহাৰকাৰীয়ে মনৰ ভাৱ ব্যক্তিগতভাৱে প্ৰকাশ কৰি আনন্দ লাভ কৰাৰ লগতে স্বাস্থ্য কৰ্মীসকলক প্ৰশংসা কৰিবলৈ ই এক আমোদজনক আৰু সৃষ্টিশীল উপায় বুলি অভিহিত কৰিছে হোৱাটছএপে ।

কোম্পানীটোৱে এক বিবৃতিৰ জৰিয়তে প্ৰকাশ কৰে যে, মহামাৰীৰ সংক্ৰমণ আৰম্ভ হোৱাৰে পৰা চৰকাৰে লোৱা পদক্ষেপত সহায় আগবঢ়োৱাৰ বাবে ২ বিলিয়নতকৈও অধিক ব্যৱহাৰকাৰীক সঠিক তথ্যৰ সৈতে সংযোগ কৰিবলৈ বিশ্ব স্বাস্থ্য সংস্থা আৰু UNICEFৰ দৰে সংগঠনৰ লগতে ১৫০ খনৰো অধিক ৰাষ্ট্ৰীয়, ৰাজ্যিক আৰু স্থানীয় চৰকাৰৰ সৈতে কোম্পানীটোৱে সহযোগিতা আগবঢ়াইছে তথা তেওঁলোকৰ কামৰ অংশীদাৰ হৈছে ।

যোৱা বছৰ গ্ল'বেল হেল্পলাইনবোৰৰ জৰিয়তে ৩ বিলিয়নতকৈও অধিক বাৰ্তা প্ৰেৰণ কৰা হৈছিল । মহামাৰীয়ে বহু দেশত পুনৰ ভয়াৱহ ৰূপ ধাৰণ কৰাৰ দিশে গতি কৰাৰ পৰিপ্ৰেক্ষিতত ইণ্ডোনেছিয়া, দক্ষিণ আফ্ৰিকা, আৰ্জেণ্টিনা, ব্ৰাজিল আৰু ভাৰতৰ দৰে দেশত চৰকাৰে প্ৰতিষেধকৰ সঠিক তথ্য আৰু পঞ্জীয়নৰ সৈতে নাগৰিকসকলক ব্যক্তিগতভাৱে সংযোগ কৰিবলৈ এই হেল্পলাইনবোৰ ব্যৱহাৰ কৰি আছে ।

কোম্পানীটোৱে বিবৃতিত উল্লেখ কৰিছে যে, চৰকাৰ আৰু আন্তঃৰাষ্ট্ৰীয় সংগঠনবোৰক বিশ্বজুৰি প্ৰতিষেধকৰ তথ্য আৰু সেৱাৰ সৈতে সংযোগ কৰাত তেওঁলোকে সহায় কৰিব বিচাৰে । হোৱাটছএপ বিজনেছ এ পি আইৰ জৰিয়তে বাৰ্তা প্ৰেৰণ কৰাৰ বাবদ পৰিশোধ কৰিবলগীয়া মাচুলো ৰেহাই দিয়া হৈছে বুলি বিবৃতিত কোৱা হৈছে ।

লগতে পঢ়ক:চিবিএচই পৰীক্ষা বাতিলৰ দাবী প্ৰিয়ংকা গান্ধীৰ