নেশ্যনেল ডেস্ক,১৮ নৱেম্বৰ : উত্তৰাখণ্ডৰ উত্তৰকাশীৰ সুৰংগৰ দুৰ্ঘটনাই সম্প্ৰতি দেশজুৰি চৰ্চা লাভ কৰিছে । চিল্কিয়াৰাত নিৰ্মীয়মান সুৰংগত ভূমিস্খলনৰ ফলত ৭ খন ৰাজ্যৰ প্ৰায় ৪১ জন শ্ৰমিক আৱদ্ধ হৈ আছে । তেওঁলোকক উদ্ধাৰৰ বাবে যোৱা ৭ দিন ধৰি অভিযান অব্যাহত আছে । লক্ষণীয়ভাৱে এই সুৰংগটোৰ মুঠ দৈৰ্ঘ্য ৪.৫৩১ কিলোমিটাৰ । গঙ্গোত্ৰী আৰু যমুনোত্ৰী ধামৰ বাবে চিল্কিয়াৰা সুৰংগ অতি গুৰুত্বপূৰ্ণ বুলি গণ্য কৰা হয় । এই সুৰংগ নিৰ্মাণৰ ফলত গঙ্গোত্ৰী ধামৰ পৰা যমুনোত্ৰী ধামলৈ দূৰত্ব ২৬ কিলোমিটাৰ হ্ৰাস কৰিব ।
উল্লেখ্য যে চিল্কিয়াৰাৰ সুৰংগটো ৮৫৩ কোটি টকা ব্যয়েৰে নিৰ্মাণ কৰা হৈছে । সুৰংগটোৰ নিৰ্মাণ ২০১৮ চনৰ জুলাই মাহত আৰম্ভ হৈছিল । ইয়াৰ নিৰ্মাণ এনএইচআইডিচিএলয়ে ২০২৪ চনৰ মাৰ্চৰ ভিতৰত সম্পূৰ্ণ কৰাৰ লক্ষ্য নিৰ্ধাৰণ কৰিছে । নিউ অষ্ট্ৰিয়ান টানেলিং পদ্ধতি ব্যৱহাৰ কৰি অত্যাধুনিক সুৰংগটো নিৰ্মাণ কৰা হৈছে ।
১২ নৱেম্বৰত সুৰংগৰ নিৰ্মাণ কাৰ্য চলি থকাৰ মাজতে ভূমিস্খলন হৈছিল । ফলত সুৰংগটোৰ ভিতৰত ৪১ জন শ্ৰমিক আৱদ্ধ হৈ পৰে । চিল্কিয়াৰাৰ প্ৰৱেশদ্বাৰৰ পৰা ২০৫ মিটাৰ পৰ্যন্ত সুৰংগটো নিৰ্মাণ কৰা হৈছে । তাৰ পাছত প্ৰায় ৬০ মিটাৰ এলেকাত ভূমিস্খলন হৈছে । সেই অংশটোত ধ্বংসাৱশেষ বিয়পি পৰিছে । আৱদ্ধ শ্ৰমিকসকলৰ ভিতৰত বিহাৰৰ ৫ জন, উত্তৰ প্ৰদেশৰ ৮ জন, পশ্চিমবংগৰ ৩ জন, ঝাৰখণ্ডৰ ১৫ জন, অসমৰ দুজন, ওড়িশাৰ ৫ জন, উত্তৰাখণ্ডৰ দুজন আৰু হিমাচল প্ৰদেশৰ এজন শ্ৰমিক আছে ।
দুৰ্ঘটনাটোৰ আজি সপ্তম দিন আৰু আজিও শ্ৰমিকসকলক উদ্ধাৰৰ প্ৰচেষ্টা অব্যাহত আছে । সুৰংগটোত আৱদ্ধ শ্ৰমিকসকলক পাইপৰ জৰিয়তে খাদ্য আৰু অক্সিজেন যোগান ধৰি থকা হৈছে । ইফালে তেওঁলোকক উদ্ধাৰৰ বাবে ইন্দোৰৰ পৰা এক নতুন অগাৰ যন্ত্ৰও অনা হৈছে ।
সুৰংগটোত আৱদ্ধ শ্ৰমিকসকলক উদ্ধাৰৰ বাবে কেইবাটাও পৰিকল্পনা কৰা হৈছে । কিন্তু এতিয়ালৈকে এটাও পৰিকল্পনা সফল হোৱা নাই । প্ৰথমতে, ক্ৰেনৰ জৰিয়তে ধ্বংসাৱশেষ আঁতৰ কৰা আৰু শ্ৰমিকসকলক উদ্ধাৰৰ পৰিকল্পনা কৰা হৈছিল । কিন্তু ক্ৰেনেৰে যেতিয়া ধ্বংসাৱশেষ আঁতৰাবলৈ আৰম্ভ কৰা হৈছিল নতুনকৈ আৱৰ্জনা আৰু ধ্বংসাৱশেষ পৰিবলৈ আৰম্ভ কৰিছিল । ইয়াৰ পাছত দ্বিতীয় পৰিকল্পনা হিচাপে ড্ৰিল মেচিনৰ জৰিয়তে ধ্বংসাৱশেষ ড্ৰিলিং কৰি ৯০০ মিমি ব্যাসৰ পাইপ সুমুৱাই দিয়া হৈছিল । যাৰ দ্বাৰা শ্ৰমিকসকলক বাহিৰলৈ উলিয়াই অনাৰ প্ৰচেষ্টা কৰা হৈছিল । কিন্তু ধ্বংসাৱশেষবোৰে পুনৰ এই পৰিকল্পনা বিফল কৰিছিল ।
তাৰ পাছত তৃতীয় পৰিকল্পনাৰ আধাৰত দিল্লীৰ পৰা বায়ু সেনাৰ বিমানৰ জৰিয়তে গধুৰ আমেৰিকান অগাৰ মেচিনৰ অৰ্ডাৰ দিয়া হয় । এই যন্ত্ৰ আহি পোৱাৰ পাছতে উদ্ধাৰ অভিযানে গতি লাভ কৰে । কিন্তু কিছু সময়ৰ পাছত গধুৰ আমেৰিকান অগাৰ যন্ত্ৰটোৰ বহন ক্ষমতা ক্ষতিগ্ৰস্ত হয় । যাৰ বাবে উদ্ধাৰ অভিযানত পলম হয় । এইবাৰ উদ্ধাৰ অভিযানৰ বাবে ইন্দোৰৰ পৰা এটা নতুন অগাৰ যন্ত্ৰ অনা হৈছে ।
দেশৰ প্ৰধানমন্ত্ৰী নৰেন্দ্ৰ মোদীয়ে উত্তৰকাশীৰ এই সুৰংগৰ উদ্ধাৰ অভিযানৰ তথ্য লৈছে । প্ৰধানমন্ত্ৰীৰ কাৰ্যালয়ৰ বিষয়াসকলে চিল্কিয়াৰালৈ আহি উদ্ধাৰ অভিযান পৰিদৰ্শন কৰিছে । প্ৰধানমন্ত্ৰীৰ কাৰ্যালয়ৰ উপ সচিব মংগেশ ঘিলদিয়াল চিল্কিয়াৰা সুৰংগৰ উদ্ধাৰস্থলীত উপস্থিত হৈছে । মংগেশ ঘিলদিয়ালৰ উত্তৰাখণ্ডত যথেষ্ট অভিজ্ঞতা আছে ।
প্ৰধানমন্ত্ৰী নৰেন্দ্ৰ মোদীৰ কাৰ্যালয়ৰ ৫ জনীয়া জ্যেষ্ঠ বিষয়াৰ এটা দল উত্তৰকাশীৰ চিল্কিয়াৰা সুৰংগৰ উদ্ধাৰস্থলীত উপস্থিত হৈছে । দলটোত পিএমঅ'ৰ উপ সচিব মংগেশ ঘিলদিয়াল, ভূতাত্ত্বিক অভিযন্তা বৰুণ অধিকাৰী, উপ সচিব মেহমুদ আহমেদ, পৰ্যটন আৰু আৰ্মান্দো কাপ্লানৰ অ'এছডি ভাস্কৰ খুলভে আৰু এক্সপোৰ্ট অভিযন্তা অন্তৰ্ভুক্ত আছে ।
লগতে পঢ়ক :আই ই ডি বিস্ফোৰণত আহত কনিষ্টবলক গ্ৰীণ কৰিড’ৰেৰে লৈ যোৱা হ’ল বিমান বন্দৰলৈ, দিল্লীত চলিব চিকিৎসা
