নিউজ ডেস্ক, ৭ আগষ্ট :ৰাহুল গান্ধীৰ লোকসভালৈ পুনৰাগমনৰ দিনটো কংগ্ৰেছে উদযাপন কৰাৰ সময়তে ইয়াৰ প্ৰতিদ্বন্দ্বী বিজেপিয়ে বিৰোধী দলটোক অভিযোগেৰে থকাসৰকা কৰাৰ চেষ্টা কৰে । এই প্ৰচেষ্টাত কংগ্ৰেছৰ বিৰুদ্ধে 'চীনা সংযোগ'ৰ অভিযোগ আনি বিষয়টো সদনত উত্থাপন কৰে ।
বিজেপি নেতা নিশিকান্ত ডুবেই দেশখনক 'বিভাজন' কৰাৰ বাবে আৰু অৰাজকতা সৃষ্টি কৰাৰ বাবে কংগ্ৰেছ নেতাই দেশবিৰোধী শক্তি আৰু চীনৰ সৈতে হাত মিলোৱাৰ অভিযোগ কৰে । যাৰবাবে সৃষ্টি হোৱা হুলস্থূলীয়া পৰিৱেশৰ বাবে অধ্যক্ষই দুপৰীয়া ২ বজালৈকে সদন স্থগিত ৰাখিবলৈ বাধ্য হয় ।
ডুবেই আমেৰিকা যুক্তৰাষ্ট্ৰৰ এখন বাতৰিকাকতত 'চীনা প্ৰপ'গাণ্ডা' আৰু আমেৰিকা যুক্তৰাষ্ট্ৰৰ প্ৰযুক্তি ফাৰ্মৰ মাজৰ সম্পৰ্কৰ বিষয়ে প্ৰকাশ কৰা এক প্ৰতিবেদনৰ কথা উল্লেখ কৰি কয় যে প্ৰবন্ধটোত এটা ভাৰতীয় বাতৰি ছাইটৰ কথাও উল্লেখ কৰা হৈছে, যাৰ ওপৰত প্ৰৱৰ্তন সঞ্চালকালয়ে তদন্ত কৰি আছে ।
সদনৰ মজিয়াত ডুবেই থিয় হৈ অভিযোগ কৰে যে দ্য নিউয়ৰ্ক টাইমছৰ এটা প্ৰবন্ধত উন্মোচিত কৰিছে যে 'টুকড়ে টুকড়ে গেং' আৰু 'কিছুমান মিডিয়া'ই ভাৰত-বিৰোধী কাৰ্যকলাপত লিপ্ত হ'বলৈ বাহ্যিক শক্তিৰ লগত যোগদান কৰিছে । তেওঁ অভিযোগ কৰে যে চীনে কেন্দ্ৰীয় চৰকাৰৰ বিৰোধিতা কৰিবলৈ কংগ্ৰেছক ধন দি আছে । ডুবেৰ মতে, কংগ্ৰেছ নেতাসকলে ২০১৬ চনত নৰেন্দ্ৰ মোদী চৰকাৰৰ বিৰোধিতা কৰিবলৈ চীনাসকলক সাক্ষাৎ কৰিছিল ।
ডুবেই চীন সন্দৰ্ভত কংগ্ৰেছৰ বিৰুদ্ধে অভিযোগ উত্থাপন কৰে আৰু নিৰ্বাচন আয়োগৰ দ্বাৰা তদন্ত বিচাৰে । বিজেপি সাংসদজনে অভিযোগ কৰে যে ৰাহুল গান্ধীয়ে ডোকলাম অচলাৱস্থাৰ সময়ত তদানীন্তন চীনা দূতক লগ কৰিছিল । তেতিয়া অধ্যক্ষই উক্ত দিনটোৰ বিষয়ে সদনত আলোচনা আগবঢ়াব বিচাৰে । কিন্তু বিৰোধী সদস্যসকলে ডুবেৰ মন্তব্যৰ প্ৰতিবাদ কৰে ।
"তেওঁলোকে চীনা বাহিনী আৰু কিছুমান সংবাদ মাধ্যমৰ জৰিয়তে ভাৰতক বিভাজন কৰিব বিচাৰে ।" ডুবেই এনেদৰে চিঞৰি উঠাত বিজেপিৰ সাংসদসকলে তেওঁৰ সমৰ্থনত ডেস্কত থপৰিয়ায় । "২০০৫ চনৰ পৰা ২০১৪ চনৰ ভিতৰত, যেতিয়াই কোনো সংকট হৈছিল, কংগ্ৰেছে চীনৰ পৰা ধন লাভ কৰিছিল । ২০০৮ চনত তেওঁলোকে ছোনিয়া গান্ধী আৰু ৰাহুল গান্ধী দুয়োকে আমন্ত্ৰণ জনাইছিল । ২০১৬ চনত তেওঁলোকে ডোকলাম সংকটৰ সময়ত চীনাসকলৰ সৈতে কথা পাতিছিল ।" সাংসদজনে লগতে কয় । তেওঁ কংগ্ৰেছ নেতা দিগ্বিজয় সিং আৰু ৰণদীপ সুৰজেৱালাৰ নামো লয় । ডুবেই দাবী কৰে যে এনৱাইটিৰ প্ৰতিবেদনত মাওবাদী আৰু জ্যেষ্ঠ সাংবাদিকসকলক কেনেকৈ ধন দিয়া হৈছিল সেয়া বৰ্ণনা কৰা হৈছে ।
আনহাতে, কংগ্ৰেছৰ সাংসদ অধীৰ ৰঞ্জন চৌধুৰীয়ে সোমবাৰে দলটোৰ হৈ লোকসভাৰ অধ্যক্ষলৈ পত্ৰ লিখি লোকসভাত বিজেপি সাংসদ নিশিকান্ত ডুবেৰ 'অপমানজনক' আৰু 'মানহানিকৰ' মন্তব্য ৰেকৰ্ডৰ পৰা আঁতৰাই দিয়াৰ দাবী জনায় । "আমি নিয়ম ৩৮০-ৰ অধীনত দাবী জনাইছোঁ যে তেওঁৰ মন্তব্য সম্পূৰ্ণৰূপে আঁতৰ কৰিব লাগে আৰু এনে অভিযোগ কেনেদৰে ৰেকৰ্ডত উত্থাপন কৰিবলৈ অনুমতি দিয়া হৈছিল তাৰো তদন্ত কৰিব লাগে ।" কংগ্ৰেছ নেতাজনে পত্ৰত উল্লেখ কৰে ।
লগতে পঢ়ক :National Handloom Day : ভাৰতৰ বিবিধ হস্ততাঁতৰ প্ৰশংসা প্ৰধানমন্ত্ৰীৰ
