নেশ্যনেল ডেস্ক,28 ডিচেম্বৰ : দেওবাৰে উত্তৰ প্ৰদেশৰ বুলন্দশ্বহৰৰ এখন হাস্পতালৰ পৰা পলায়ন কৰা তিনি ক’ভিড পজিটিভ কয়দীক পুনৰ আটক কৰে জিলা আৰক্ষীয়ে ৷
বুলন্দশ্বহৰৰ জ্যেষ্ঠ আৰক্ষী অধীক্ষক সন্তোষ কুমাৰে সংবাদ মাধ্যমযোগে জনোৱা মতে, 19 ডিচেম্বৰত চাৰিজন কয়দীৰ দেহত ধৰা পৰিছিল ক’ভিড-19ৰ অৱস্থিতি ৷ ইয়াৰ পাচতে চাৰিওজনকে চিকিৎসাৰ বাবে হাস্পতালত ভৰ্তি কৰোৱা হৈছিল ৷
তেওঁলোকৰ ৱাৰ্ডৰ বাহিৰত আৰক্ষী জোৱান নিয়োগ কৰা হৈছিল যদিও চিকিৎসালয়ৰ ছাদলৈ যোৱা এখন দুৱাৰ ভিতৰৰ পৰা বন্ধ কৰি ৰখা হৈছিল । বন্ধ দুৱাৰৰ সুযোগ লৈ কয়দী কেইজনে দুৱাৰ ভাঙি পলায়ন কৰা বুলি জ্যেষ্ঠ আৰক্ষী অধীক্ষক গৰাকীয়ে সদৰি কৰে ৷
ঘটনা সংঘটিত হোৱাৰ পাচতে আৰক্ষীয়ে কয়দী চাৰিজনক বিচাৰিবলৈ আৰম্ভ কৰাৰ লগতে ঘটনা সন্দৰ্ভত অভিযোগ নামা দাখিল কৰে ৷ কয়দী কেইজনৰ তিনিজনক আটক কৰাৰ পাচত সুৰক্ষিতভাৱে ঘূৰাই আনিবলৈ এম্বুলেন্সৰ ব্যৱস্থা কৰা হৈছে ৷ পলাতক এজন কয়দীৰ বৰ্তমানো অনুসন্ধান অব্যাহত ৰাখিছে আৰক্ষীয়ে ৷
লগতে পঢ়ক :মুফ্টী, আব্দুল্লাৰ বাবে ডিডিচি নিৰ্বাচন আছিল এক বিদায় অনুষ্ঠান : তৰুণ চুঘ