বিহাৰত হিন্দু উৎসৱৰ বন্ধ হ্ৰাস মুছলমানৰ বৃদ্ধি; কেন্দ্ৰীয় মন্ত্ৰী গিৰিৰাজ সিঙৰ অভিযোগ

বিহাৰৰ চৰকাৰী বিদ্যালয়সমূহত ২০২৪ বৰ্ষৰ বন্ধৰ কেলেণ্ডাৰ প্ৰকাশ পোৱাৰ লগে লগে ৰাজনীতি আৰম্ভ হৈছে । কেন্দ্ৰীয় মন্ত্ৰী গিৰিৰাজ সিঙে হিন্দু উৎসৱত বন্ধ হ্ৰাস কৰাৰ শিক্ষা বিভাগৰ সিদ্ধান্তক গৰিহণা দিছে । তেওঁ নীতিশ কুমাৰ চৰকাৰকো আক্ৰমণ কৰি কয় যে এইটো 'ইছলামিক গণৰাজ্য বিহাৰ' যেন লাগিছে ।

নিউজ ডেস্ক, ২৮ নৱেম্বৰ : সোমবাৰে বিহাৰ ৰাজ্যিক শিক্ষা বিভাগে ২০২৪ বৰ্ষৰ বাবে বন্ধৰ কেলেণ্ডাৰ প্ৰকাশ কৰে । প্ৰকাশিত কেলেণ্ডাৰ অনুসৰি, এইবাৰ বিহাৰৰ চৰকাৰী বিদ্যালয়সমূহত বন্ধৰ দিন যথেষ্ট কৰ্তন কৰা হৈছে । হিন্দু ধৰ্মৰ সৈতে সম্পৰ্কিত বহু গুৰুত্বপূৰ্ণ উৎসৱত বন্ধ দিয়া হোৱা নাই । বিজেপিয়ে ইয়াত তীব্ৰ আপত্তি জনাইছে । কেন্দ্ৰীয় মন্ত্ৰী গিৰিৰাজ সিঙেও এই সিদ্ধান্তক সমালোচনা কৰিছে ।

বিজেপিৰ আক্ৰমণাত্মক নেতা হিচাপে পৰিচিত গিৰিৰাজ সিঙে তেওঁৰ এক্স হেণ্ডেলত লিখিছে, "ইছলামিক ৰিপাব্লিক অব বিহাৰ । নীতিশ আৰু লালু চৰকাৰে বিদ্যালয়ত মুছলমান উৎসৱৰ বন্ধ বৃদ্ধি কৰিছে, হিন্দু উৎসৱত বন্ধ কমাইছে ।"

কেন্দ্ৰীয় মন্ত্ৰী গিৰিৰাজ সিঙে তেওঁৰ আন এটা পোষ্টত লিখিছে, "বিহাৰত বহুতো হিন্দু উৎসৱৰ বন্ধ বাতিল কৰা হৈছে আৰু ঈদ-মহৰমৰ বন্ধ বৃদ্ধি কৰা হৈছে । এয়াও হৈছে গজৱা-ই-হিন্দৰ এক অংশ ।"

উল্লেখ্য যে বিহাৰ শিক্ষা বিভাগৰ নতুন কেলেণ্ডাৰ অনুসৰি, ২০২৪ চনত হাৰটালিকা তীজ, জিতিয়া, ভাতৃ দ্বিতীয়া, ৰক্ষা বন্ধন, মকৰ সংক্ৰান্তি, সৰস্বতী পূজা, জন্মাষ্টমী আৰু ৰাম নৱমীৰ দিনতো বিদ্যালয় খোলা থাকিব । ইয়াৰ উপৰি দশেৰাত বৰ্তমানৰ ৬ দিনৰ পৰিৱৰ্তে মাত্ৰ ৩ দিন বন্ধ দিয়া হৈছে ।

আনহাতে, শিক্ষা বিভাগৰ অধিসূচনা অনুসৰি, মুছলমান ধৰ্মৰ সৈতে সম্পৰ্কিত উৎসৱবোৰত বন্ধৰ সংখ্যা হ'ব ১০ । ইয়াৰ ভিতৰত আছে শ্বব-এ-বাৰাট, ঈদ, বকৰিদ, মহৰম, চেহলুম আৰু হজৰত মহম্মদৰ জন্ম-মৃত্যু দিৱস । বিজেপি নেতাসকলে অভিযোগ কৰিছে যে যদিও বহুতো হিন্দু উৎসৱৰ বন্ধ বাতিল কৰা হৈছে, ইয়াৰ বিপৰীতে ঈদ আৰু মহৰমৰ বন্ধ বৃদ্ধি কৰা হৈছে ।

লগতে পঢ়ক :মহাত্মা গান্ধীৰ সৈতে প্ৰধানমন্ত্ৰী মোদীক তুলনা কৰি বিতৰ্কত উপ-ৰাষ্ট্ৰপতি