নেশ্যনেল ডেস্ক, ১৬ জুন :ভাৰত চৰকাৰে অন্তিম জাননী প্ৰেৰণ কৰাৰ পিছতো ভাৰতীয় আইন অনুসৰণ কৰিবলৈ ব্যৰ্থ হৈছে টুইটাৰ (Twitter) কতৃপক্ষ । যাৰ বাবে টুইটাৰৰ বিৰুদ্ধে ক্ষোভিত হৈ পৰিছে নেতাসকল । কেন্দ্ৰীয় মন্ত্ৰী ৰবি শংকৰ প্ৰসাদৰ বিশেষ টুইট কৰি কতৃপক্ষৰ প্ৰতি ক্ষোভ উজাৰে । মন্ত্ৰী গৰাকী ভাৰতত মধ্যস্থতাকাৰী মঞ্চ হিচাপে মৰ্যাদা হেৰুওৱাৰ বিষয়ে উল্লেখ কৰি টুইটাৰৰ বিৰুদ্ধে কয় যে মাইক্ৰ'ব্লগিং চাইটটোৱে একাধিক সুযোগ প্ৰদান কৰা স্বত্বেও আইনসমূহ পালন কৰাত ব্যৰ্থ হৈছে ।
ভাৰতীয় কোম্পানী যেনে ফাৰ্মা হওঁক, তথ্য প্ৰযুক্তি হওঁক বা আনসমূহে আমেৰিকা যুক্তৰাষ্ট্ৰত বা বিদেশত যেতিয়া ব্যৱসায়ৰ বাবে যায় তেওঁলোকে স্বেচ্ছাই স্থানীয় আইন অনুসৰণ কৰে । কিন্তু টুইটাৰৰ দৰে প্লেটফৰ্মে কিয় উৎপীড়ন আৰু অপব্যৱহাৰৰ ভুক্তভোগীসকলক মাত দিয়াৰ বাবে প্ৰস্তুত কৰা ভাৰতীয় আইন অনুসৰণত কিয় নিৰ্লিপ্ত ভুমিকা পালন কৰিছে বুলিও প্ৰশ্ন কৰে মন্ত্ৰীগৰাকীয়ে ।
উল্লেখ্য যে, ৫ জুনত কেন্দ্ৰীয় ইলেক্ট্ৰ'নিক্স আৰু তথ্য প্ৰযুক্তি মন্ত্ৰালয়ে (meity) টুইটাৰক চূড়ান্ত জাননী জাৰি কৰি ছ'চিয়েল মিডিয়া কোম্পানী সম্পৰ্কীয় নতুন নিয়মসমূহ পালন কৰিবলৈ কৈছিল । আনহাতে ইয়াৰ উত্তৰত টুইটাৰে কয় যে তেওঁলোকে চৰকাৰলৈ লিখিছে যে ছ'চিয়েল মিডিয়া কোম্পানীসমূহৰ বিষয়ে নতুন নিৰ্দেশনা পালন কৰাৰ প্ৰচেষ্টা কৰা হৈছে আৰু ই চুক্তিভিত্তিত এজন নোডেল ঠিকাভিত্তিক ব্যক্তি (NCP) আৰু এজন আৱাসী অভিযোগ বিষয়াক (RGO) নিযুক্তি দিছে ।