নেশ্যনেল ডেস্ক,২৬ মাৰ্চ:ত্ৰিপুৰাত শিক্ষকৰ প্ৰতিবাদ অব্যাহত আছে । এই বিষয়কলৈ বিধানসভাৰ মজিয়াতো তীব্ৰ প্ৰতিক্ৰিয়াৰ সৃষ্টি হৈছে । শেহতীয়াকৈ মুখ্যমন্ত্ৰী বিপ্লৱ কুমাৰ দেৱে সদনত শিক্ষকসকলক সমালোচনা কৰাৰ পিছতে জাঙুৰ খাই উঠিছে বঞ্চিত শিক্ষকসকল । তেওঁলোকৰ প্ৰতিবাদ অব্যাহত ৰখাৰ বাবে উচ্চ ন্যায়ালয়ত শিক্ষকসকলে কৰা আবেদনক সঁহাৰি দিছে ন্যায়ালয়ে কিন্তু এই কথা মুখ্যমন্ত্ৰীগৰাকীয়ে অৱগত নহয় বুলি অভিযোগ কৰে শিক্ষকসকলে ।
এগৰাকী বঞ্চিত শিক্ষকৰ মতে উচ্চ ন্যায়ালয়ে তেওঁলোকৰ পক্ষত ৰায় প্ৰদান কৰিছে আৰু ন্যায়াধীশ সুভাষ তালাপাত্ৰৰ নেতৃত্বত এক বিচাৰপীঠে লগতে কৈছিল যে পৰৱৰ্তী ৪৮ ঘণ্টাৰ ভিতৰত আৰক্ষীয়ে শিক্ষকৰ প্ৰতিবাদৰ বাবে অনুমতি দিব লাগিব । আন্দোলনৰ স্থান কিছু পৃথক হ'ব পাৰে কিন্তু গণতান্ত্ৰিক প্ৰতিবাদৰ ক্ষেত্ৰত আৰক্ষীয়ে পক্ষপাতমূলক স্থিতি ল'ব নোৱাৰিব ।
শিক্ষকগৰাকীয়ে লগতে কয় যে তেওঁলোকে শীঘ্ৰেই তেওঁলোকৰ আন্দোলন পুনৰ আৰম্ভ কৰিব যিটো পূৰ্বে শিক্ষক আৰু আৰক্ষীৰ মাজত বহুতো হিংসাত্মক সংঘৰ্ষৰ পিছত আৰক্ষীৰ দ্বাৰা বন্ধ কৰা হৈছিল । শিক্ষকসকলে অভিযোগ কৰে যে ৰাজনৈতিক নেতাৰ হস্তক্ষেপত আৰক্ষীয়ে শান্তিপূৰ্ণভাৱে আন্দোলন কৰা শিক্ষকসকলক উচ্ছেদ কৰিছিল আৰু আনকি বহুতো আহত হৈ তেওঁলোকৰ আন্দোলনৰ স্থান ত্যাগ কৰিবলৈ বাধ্য হৈছিল ।