নিউজ ডেস্ক, ১৬ জুন : উত্তৰাখণ্ডৰ ইতিহাসৰ এটা ক'লা দিন হৈছে ১৬ জুন । যিটো তাৰিখ আগন্তুক কেইবাশ বছৰৰ বাবে বিভিন্ন দৃষ্টিকোণত স্মৰণীয় হৈ থাকিব । ২০১৩ চনৰ ১৬ জুনত সংঘটিত কেদাৰনাথ দুৰ্যোগৰ শুকুৰবাৰে ১০ বছৰ সম্পূৰ্ণ হ'ল । কিন্তু কেদাৰনাথৰ লগতে সমগ্ৰ দেশে এতিয়াও পাহৰিব পৰা যোৱা নাই উক্ত কালিকালগা দিনটোৰ বিভীষিকাৰ কথা । বছৰে বছৰে এই বিভীষিকাৰ পুৰণি ঘাটুকুৰা সজীৱ হৈ পৰে । কিন্তু তাৰ মাজতো বিগত ১০ বছৰত সকলোৱে এই দুৰ্বিষহ দিনটোৰ কথা পাহৰিবলৈ নিজকে শক্তিশালী কৰিছে । আনহাতে, সময়ৰ অগ্ৰগতিৰ লগে লগে এই পুৰণি আঘাতক পাহৰিবলৈও সকলোৱে চেষ্টা কৰিছে ।
কেদাৰনাথ দুৰ্যোগ কি আছিল ?
২০১৩ চনত স্বাভাৱিক আৰম্ভণিৰ তাৰিখতকৈ অলপ আগতে উত্তৰাখণ্ডত বৰষাৰ আগমন ঘটিছিল । যাৰ ফলত জুন মাহৰ প্ৰথম সপ্তাহৰ পৰাই ৰাজ্যখনত বৰষুণ হ'বলৈ আৰম্ভ কৰিছিল । আনহাতে, জুনৰ দ্বিতীয় সপ্তাহলৈকে বৰষুণে গতি লাভ কৰিছিল । বতৰ বিজ্ঞান বিভাগৰ পূৰ্বানুমান অনুযায়ীয়ে সমগ্ৰ ৰাজ্যখনতে ধাৰাবাহিক বৰষুণ হৈছিল । ইফালে এই সময়ছোৱাতে ১৫ জুনৰ পৰা নিৰন্তৰ হৈ থকা বৰষুণ ১৭ জুনৰ পুৱালৈকে ধাৰাবাহিকভাৱে চলি আছিল । যাৰ ফলত সৰু-সুৰা বিপৰ্যয়ৰ আশংকা কৰা হৈছিল ।
কিন্তু সেই সময়তে কেদাৰনাথৰ এজন বিষয়াই প্ৰেৰণ কৰা এখন ছবিয়ে সকলোৰে উদ্বেগ বৃদ্ধি কৰি তোলে । বিবৱৰণী অনুসৰি, কেদাৰনাথত মূষলধাৰ বৰষুণ হোৱাৰ ফলত তাত কিছু ক্ষতি হয় । কিন্তু যেতিয়া ১৭ জুনৰ পুৱা বৰষুণ কমিবলৈ আৰম্ভ কৰে, তেতিয়া যি দৃশ্য পোহৰলৈ আহে সেয়া সঁচাকৈয়ে হৃদয়বিদাৰক আছিল । দৰাচলতে সম্পূৰ্ণভাৱে পৰিপূৰ্ণ কেদাৰনাথ ধামত কেদাৰনাথ যাত্ৰা ঋতুৰ শীৰ্ষ সময়ত সমগ্ৰ কেদাৰনাথ ধাম তীৰ্থযাত্ৰীৰে ভৰি আছিল । কিন্তু সেই সময়তে কেদাৰনাথৰ প্ৰায় ৯০ শতাংশ ধ্বংসাৱশেষলৈ ৰূপান্তৰিত হৈছিল । অৱশ্যে চৰকাৰী পৰিসংখ্যাই যিয়েই নকওক কিয়, কিন্তু তাত থকা প্ৰতিজন প্ৰত্য়ক্ষদৰ্শীয়ে কয় যে সেইদিনা কেদাৰনাথ ধামত ১০ হাজাৰোধিক লোক উপস্থিত আছিল । যাৰ ভিতৰত হাজাৰ হাজাৰ লোক এতিয়াও সন্ধানহীন বা তেওঁলোকৰ কোনো ৰেকৰ্ডো নাই ।