আগৰতলা, 3 মে’ :মুখ্যমন্ত্ৰী বিপ্লৱ কুমাৰ দেৱৰ নিৰ্দেশৰ পাচতেই ত্ৰিপুৰা আৰক্ষীয়ে প্ৰাক্তন বিজেপি মন্ত্ৰী সুদ্বীপ ৰয় বৰ্মণৰ ব্যক্তিগত নিৰাপত্তাৰক্ষী আৰু বাহন চালকক আক্ৰমণ কৰাৰ অভিযোগত তিনিজন লোকক আটক কৰিছে (Attack on Sudip Roy Barman's driver and PSO) ৷ এগৰাকী জ্যেষ্ঠ আৰক্ষী বিষয়াই কয় যে, এই ঘটনা সংঘটিত হোৱাৰ পাচতেই আৰক্ষীয়ে ক্ষীপ্ৰ তদন্ত আৰম্ভ কৰে আৰু সকলো চোৰাংচোৱাক সতৰ্ক কৰি দিছিল ৷ এই তদন্তৰ যোগেদি বৰ্তমানলৈকে তিনিজন লোকক আটক কৰা হৈছে (Three nabbed for attack on Sudip Roy Barman) ৷
আৰক্ষী বিষয়া গৰাকীয়ে লগতে কয় যে, তদন্ত প্ৰক্ৰিয়া অব্যাহত আছে আৰু এই ঘটনাত জড়িত অধিক লোক আটক হোৱাৰ সম্ভাৱনা আছে ৷ মুখ্যমন্ত্ৰীৰ কাৰ্যালয়ৰ এটা সূত্ৰই জনোৱা মতে, আগতলাৰ কৃষ্ণনগৰত সংঘটিত এই হিংসাত্মক ঘটনাৰ খবৰ পোৱাৰ পাচতে মুখ্যমন্ত্ৰী বিপ্লৱ কুমাৰ দেৱে ৰাজ্যখনৰ আৰক্ষী সঞ্চালক প্ৰধানৰ সৈতে কথা পাতে ৷ ঘটনাত জড়িত সকলৰ বিৰুদ্ধে কঠোৰ ব্যৱস্থা গ্ৰহণৰ বাবেও আৰক্ষী সঞ্চালক প্ৰধানগৰাকীক নিৰ্দেশ দিয়ে মুখ্যমন্ত্ৰীয়ে ৷