নিউজ ডেস্ক, 24 ডিচেম্বৰ : কেৰালাৰ কান্নুৰ জিলাৰ কাদিৰুৰৰ সমীপৰ এক স্ক্ৰেপ য়াৰ্ডত দেওবাৰে আৱৰ্জনা পৃথক কৰাৰ সময়ত সংঘটিত হোৱা বিস্ফোৰণত দুটি শিশুসহ তিনিজন লোক অগ্নিদগ্ধ হৈ আঘাতপ্ৰাপ্ত হয় ৷ আহতসকল অসমৰ বুলি জানিব পৰা গৈছে ৷
জানিব পৰা মতে পুৱা প্ৰায় 9 বজাত এই বিস্ফোৰণ সংঘটিত হয় ৷ প্ৰাথমিক তদন্তত প্ৰকাশ পাইছে যে দেশীয়ভাৱে নিৰ্মিত বোমাৰ দ্বাৰা এই বিস্ফোৰণ সংঘটিত হৈছে ৷ তথ্যৰ ভিত্তিত আৰক্ষী ঘটনাস্থলীত উপস্থিত হয় ৷ এই ঘটনা সন্দৰ্ভত ইতিমধ্যে গোচৰ ৰুজু কৰিছে আৰক্ষীয়ে ৷ আহতসকলক ততাতৈয়াকৈ নিকটৱৰ্তী দুখন চিকিৎসালয়লৈ প্ৰেৰণ কৰা হয় ৷
আৰক্ষীয়ে জনোৱা মতে, বিস্ফোৰণ সংঘটিত হোৱাৰ সময়ত অসমৰ বাসিন্দা শ্বাহিদ আলী আৰু তেওঁৰ পুত্ৰ নুৰুদ্দিন আৰু মুতালিবে আৱৰ্জনা নিস্কাশন প্ৰকল্পত পৃথকীকৰণৰ কাম চলাই আছিল ৷ আহত আটাইকেইজনক ততাতৈয়াকৈ ওচৰৰ চিকিৎসালয়লৈ প্ৰেৰণ কৰা হয় ৷
আৰক্ষীয়ে জনোৱা মতে, আলীৰ হাত আৰু পেটত অগ্নিদগ্ধ হৈ গুৰুতৰভাৱে আঘাতপ্ৰাপ্ত হোৱাৰ লগতে তেওঁক পাৰিয়াৰাম চিকিৎসা মহাবিদ্যালয়ত ভৰ্তি কৰোৱা হৈছে ৷ ইফালে তেওঁৰ পুত্ৰ কুঠুপাৰম্বা চিকিৎসালয়ত চিকিৎসাধীন হৈ আছে বুলি আৰক্ষীয়ে জানিবলৈ দিয়ে ৷ আৰক্ষীয়ে জনোৱা মতে, প্লাষ্টিকৰ কেনৰ দৰে দেখা পাত্ৰ এটা খুলি দিয়াৰ সময়তে এই বিস্ফোৰণ সংঘটিত হয় ৷
আগষ্ট মাহত এক অনুৰূপ ঘটনাত মুশ্বীৰাবাদৰ ভোলকপুৰ অঞ্চলৰ এখন স্ক্ৰেপ য়াৰ্ডত বিস্ফোৰণত এজন স্ক্ৰেপ বিক্ৰেতা আহত হৈছিল ৷ তেওঁ প্লাষ্টিকৰ কেন এটা খুলিবলৈ চেষ্টা কৰি আছিল যেতিয়া বিস্ফোৰণ সংঘটিত হয় ৷ ঘটনাত শৰীৰৰ 55 শতাংশ অগ্নিদগ্ধ হোৱা লোকজনক গান্ধী চিকিৎসালয়ত ভৰ্তি কৰোৱা হয় ৷
ইয়াৰ পূৰ্বে ভীৱণ্ডীৰ এটা স্ক্ৰেপ ডিলাৰৰ গুদামত সংঘটিত বিস্ফোৰণত দুজন লোক নিহত হয় ৷ গুদামটোত ড্ৰামত জমা হৈ থকা এটা ৰাসায়নিক পদাৰ্থত জুই লাগিছিল যাৰ ফলত বিস্ফোৰণ সংঘটিত হৈছিল ৷
লগতে পঢ়ক :নামাজ পঢ়ি থকাৰ সময়তে প্ৰাক্তন আৰক্ষী বিষয়াক গুলীয়াই হত্যা সন্ত্ৰাসবাদীৰ
