নেশ্যনেল ডেস্ক, ৩০ এপ্ৰিল: ভাৰত আৰু ৰাছিয়াৰ সৌহাদ্যপূৰ্ণ সম্পৰ্কৰ প্ৰতীক স্বৰূপ ৰাছিয়াৰ এছ-৪০০ ট্ৰাইম্ফ বায়ু প্ৰতিৰক্ষা ক্ষেপণাস্ত্ৰ প্ৰণালী নিৰ্ধাৰিত সময়তে ভাৰত পাবহি । জ্যেষ্ঠ সাংবাদিক সঞ্জীৱ কুমাৰ বৰুৱাৰ প্ৰতিবেদনত প্ৰকাশ পাইছে এই তথ্য । ৰাছিয়াত থকা ভাৰতীয় ৰাষ্ট্ৰদূত বালা ভেংকেশ বাৰ্মাই বৃহস্পতিবাৰে সন্ধিয়া মস্কোত কয় যে, ভাৰত-ৰাছিয়াৰ সামৰিক চুক্তিৰ এক অংশ হিচাপে চলিত বৰ্ষৰ শেষৰ ভাগলৈকে এই ক্ষেপণাস্ত্ৰ প্ৰণালীৰ প্ৰথম ৰেজিমেণ্ট ছেট ভাৰতৰ হাতত অৰ্পণ কৰাৰ পৰিকল্পনা কৰিছে ৰাছিয়াই ।
ৰাছিয়াৰ এক সংবাদ গোষ্ঠীয়ে এই কথা প্ৰকাশ কৰিছে । ৪০ হাজাৰ কোটি টকা ব্যয় সাপেক্ষে ৰাছিয়াৰ পৰা ক্ৰয় কৰা, পৃথিৱী পৃষ্ঠৰ পৰা বায়ুলৈ মধ্যম আৰু দীৰ্ঘ দূৰত্বৰ এণ্টি-এয়াৰক্ৰাফ্ট মিছাইল প্ৰণালী হৈছে অতি শক্তিশালী অস্ত্ৰ । ই ৪০০ কিলোমিটাৰ আৰু ৩০ কিলোমিটাৰ উচ্চতালৈকে বম্বাৰ, ষ্টিল্থ ফাইটাৰ, মিছাইল আৰু ড্ৰোন আদিৰ সৈতে মোকাবিলা কৰিব পাৰে আৰু একেলগে ৩৬টা মিছাইল ধ্বংস কৰিব পাৰে ।
২০১৫ চনতে ভাৰতে এই ক্ষেপণাস্ত্ৰ প্ৰণালী ৰাছিয়াৰ পৰা বিচাৰিছিল । ২০১৮ চনৰ অক্টোবৰ মাহত ৰাছিয়াৰ ৰাষ্ট্ৰপতি ভ্লাদিমীৰ পুটিনৰ ভাৰত ভ্ৰমণৰ সময়ত এই ক্ষেপণাস্ত্ৰ প্ৰণালীৰ পাঁচটা ৰেজিমেন্ট ছেট প্ৰদান কৰাৰ বাবে ভাৰতৰ সৈতে ৰাছিয়াৰ এক চুক্তি স্বাক্ষৰিত হয় । ভাৰত আৰু ৰাছিয়া সামৰিক সম্পৰ্ক অতি ঘনিষ্ঠ আৰু ভাৰতৰ ৬০ শতাংশৰো অধিক প্ৰতিৰক্ষা সঁজুলি ৰাছিয়ান মূলৰ ।