নেশ্যনেল ডেস্ক, 12 নৱেম্বৰ :ৰাজপথত বৃদ্ধি পাইছে তীব্ৰবেগী যান-বাহনৰ দৌৰাত্ম্য ৷ শনিবাৰে নিশা লুধিয়ানাত তীব্ৰবেগী বিলাসী বাহনে মহতীয়ালে দুখন মটৰ চাইকেলক ৷ যাৰ ফলত গুৰুতৰভাৱে আহত হয় দুই মটৰ চাইকেল আৰোহী ৷ বৰ্তমান আহত দুই ব্যক্তি চিকিৎসকৰ নিৰীক্ষণত আছে বুলি জানিব পৰা গৈছে ৷
বিৱৰণি অনুসৰি, শনিবাৰে নিশা এখন তীব্ৰবেগী থাৰ বাহনে নিয়ন্ত্ৰণ হেৰুৱাই লুধিয়ানাত গিল ৰোডত পূৰ্বৰে পৰা ৰৈ থকা 2 খন মটৰ চাইকেলক খুন্দা মাৰে । ফলত দুয়োখন মটৰ চাইকেল থাৰ বাহনখনৰ তলত আবদ্ধ হৈ পৰে । এই দুৰ্ঘটনাটোত দুজন ব্যক্তি গুৰুতৰভাৱে আহত হোৱাৰ লগতে ইয়াৰে এজনৰ ভৰিও ভাঙি যায় বুলি জানিব পৰা গৈছে ।
ক্ষুব্ধ লোকে থাৰ বাহনখন ভাঙি পেলায় :
থাৰ বাহনখনত থকা যাত্ৰীসকলে পাৰ্টি কৰি আছিল ৷ তেনেতে নিয়ন্ত্ৰণ হেৰুৱাই দুৰ্ঘটনাত পতিত হয় বাহনখন ৷ ইফালে স্থানীয় ৰাইজে দুৰ্ঘটনাগ্ৰস্ত বাহনখনৰ পৰা মাদক দ্ৰব্যৰ বটলো উদ্ধাৰ কৰিছে ৷ তাৰ পাচতে ক্ষোভিত স্থানীয় ৰাইজে বাহনখন ভাঙি লণ্ডভণ্ড কৰে ।
আনহাতে এই ঘটনাৰ খবৰ লাভ কৰি উক্ত স্থানত আৰক্ষী উপস্থিত হৈ আৰম্ভ কৰে তদন্ত আৰু সেই আৰক্ষীৰ হাততে স্থানীয় ৰাইজে থাৰ বাহনখনৰ চালকজনক গটাই দিয়ে ৷ জানিব পৰা মতে, বৰ্তমান আৰক্ষীয়ে সমগ্ৰ বিষয়টোৰ তদন্ত অব্যাহত ৰাখিছে ।