নেশ্যনেল ডেস্ক, ৩০ জুলাই :জম্মু-কাশ্মীৰত অব্যাহত আছে পাকিস্তানী সন্ত্ৰাসবাদীৰ (militants) কাৰ্যকলাপ । শেহতীয়াকৈ ড্ৰোনৰ (Drone) জৰিয়তে পাকিস্তানীসকলে ভাৰতীয় সেনা (Indian Army) আৰু ভাৰতৰ গতিবিধি নজৰ ৰাখিবলৈ আৰম্ভ কৰা দেখা গৈছে । যাৰ বাবে কিছুদিনৰ পৰা জম্মু-কাশ্মীৰৰ বহু স্থানত পাকিস্তানী ড্ৰোন দেখিবলৈ পোৱা গৈছে ।
এইবাৰ পুনৰ জম্মু-কাশ্মীৰৰ চাম্বা জিলাৰ তিনিটা পৃথক স্থানত সন্দেহযুক্ত পাকিস্তানী ড্ৰোন (Pakistani Drone) ঘূৰি থকা দেখিবলৈ পোৱা গৈছে । বৃহস্পতিবাৰে নিশা প্ৰায় ৮.৩০ বজাত বাৰী-ব্ৰহ্মা, চিলাডিয়া আৰু গগৱাল অঞ্চলত একেলগে ড্ৰোনবোৰ দেখা গৈছে । আৰক্ষী সূত্ৰই জনোৱা মতে সীমান্ত সুৰক্ষা বাহিনীৰ (BSF) জোৱানসকলে পাকিস্তানৰ ফালে উভতি যোৱাৰ পূৰ্বে চিলাডিয়াৰ এখন ড্ৰোনৰ ফালে কেইবা ৰাউণ্ড গুলী চালনা কৰিছিল । অৱশ্যে বাকী দুখন ড্ৰোন বাৰী ব্ৰহ্মানাত সংবেদনশীল নিৰাপত্তা স্থাপনা আৰু গগৱালৰ জম্মু-পাঠানকোট ঘাইপথৰ ওপৰেৰে ঘূৰি থকাৰ অলপ পিছতে আকাশৰ পৰা অদৃশ্য হৈ যায় ।
এই ঘটনাৰ পাছতে অধিক অনুসন্ধানৰ বাবে শীৰ্ষ বিষয়াসকল সেই স্থানলৈ ৰাওনা হোৱা বুলি জানিব পৰা গৈছে । ইয়াৰ ওচৰৰে কানাচকৰ সীমান্ত বেল্টত প্ৰায় এসপ্তাহ পূৰ্বে পাঁচ কিলোগ্ৰাম ইম্প্ৰুভাইজড এক্সপ্লোচিভ ডিভাইচ (IED) সামগ্ৰী কঢ়িয়াই নিয়া এখন পাকিস্তানী ড্ৰোনক আৰক্ষীয়ে গুলীবৰ্ষণ কৰি ধ্বংস কৰিছিল ।