নিউজ ডেস্ক, ১১ জানুৱাৰী : সমগ্ৰ দেশতে এতিয়া ৰামময় পৰিৱেশ । অযোধ্যাত ৰাম মন্দিৰ উদ্বোধনক লৈ এতিয়া যেন এক উৎসৱমুখৰ পৰিৱেশে বিৰাজ কৰিছে । কেৱল অযোধ্যায়ে নহয়, দেশৰ চুকে-কোণে বিয়পি পৰিছে ৰামলালাৰ প্ৰাণ প্ৰতিষ্ঠাৰ বাবে উল্লাস আৰু উদ্দীপনা । কিন্তু তাৰ মাজতে দেশৰ ৰাজনীতিও উত্তাল হৈ আছে ।
শাসক-বিৰোধীৰ অভিযোগ-প্ৰতি অভিযোগৰ মাজত ৰাম মন্দিৰক লৈ ৰাজনৈতিক মহল তীব্ৰ চৰ্চাত আছে । কংগ্ৰেছে ইতিমধ্যে এই অনুষ্ঠানৰ সময়ক লৈ কেন্দ্ৰীয় চৰকাৰক আক্ৰমণ কৰি আছে । আনহাতে, কংগ্ৰেছৰ উপৰি শংকৰাচাৰ্যসকলেও অনুষ্ঠানটোৰ সময় সম্পৰ্কে প্ৰশ্ন উত্থাপন কৰিছে । কিন্তু ইয়াৰ মাজতে আন এক বিষয়ে এই পৰিৱেশত চৰ্চা লাভ কৰিছে ।
এইবাৰ ৰাম মন্দিৰ বিষয়ত বিজেপি নেতা তথা প্ৰাক্তন আইন মন্ত্ৰী সুব্ৰমণিয়ম স্বামীয়ে প্ৰধানমন্ত্ৰী নৰেন্দ্ৰ মোদীক প্ৰত্যক্ষভাৱে আক্ৰমণ কৰিছে । তেওঁ এক্সৰ এটা পোষ্টৰ জৰিয়তে প্ৰধানমন্ত্ৰী নৰেন্দ্ৰ মোদীৰ বিৰুদ্ধে গুৰুতৰ অভিযোগ উত্থাপন কৰিছে । তেওঁ তাত লিখিছে যে প্ৰধানমন্ত্ৰী মোদীয়ে উচ্চতম ন্যায়ালয়ত ৰাম জন্মভূমি গোচৰটো বিলম্বিত কৰিবলৈ চেষ্টা কৰিছিল ৷
তেওঁ লিখিছে যে যেতিয়া বিষয়টো সমাপ্তিৰ দিশে আহিছিল, চৰকাৰে অযোধ্যাৰ সকলো ভূমি ঘূৰাই দিয়াৰ বাবে আবেদন দাখিল কৰিছিল ৷ যিটো পি ভি নৰসিংহ ৰাওৰ চৰকাৰে ৰাষ্ট্ৰীয়কৰণ কৰিছিল । কিন্তু উচ্চতম ন্যায়ালয়ে ইয়াক উপেক্ষা কৰি ৰায় দিয়াৰ বাবে ধন্যবাদ জনোৱা উচিত । মুখ্য ন্যায়াধীশ ৰঞ্জন গগৈ আৰু আন ৪ গৰাকী ন্যায়াধীশক ধন্যবাদ জনাব লাগে ।
নিজৰ এক্স পোষ্টত স্বামীয়ে লিখিছে, "এইগৰাকী সেইগৰাকী মুখ্য ন্যায়াধীশ কেশৰ সিং আছিল, যিয়ে মোৰ প্ৰাৰ্থনা কৰাৰ মৌলিক অধিকাৰৰ যুক্তিৰ কেন্দ্ৰীয় তাৎপৰ্য দেখিছিল । তেওঁ মোৰ আবেদন উচ্চতম ন্যায়ালয়ৰ বিচাৰপীঠক হস্তান্তৰ কৰিছিল আৰু নিৰ্দেশ দিছিল যে সকলো আবেদনৰ শুনানি হ'ব ।"
উল্লেখ্য যে শেহতীয়া বছৰবোৰত দেশৰ ভিতৰতে থাকি প্ৰধানমন্ত্ৰী নৰেন্দ্ৰ মোদীক সমালোচনা কৰা আটাইতকৈ ডাঙৰ সমালোচক হৈছে সুব্ৰমণিয়ম স্বামী । তেওঁ মোদীক সমালোচনা কৰিবলৈ কোনো এটা সুযোগ এৰি নিদিয়ে । বিশেষকৈ প্ৰধানমন্ত্ৰী মোদীৰ অৰ্থনৈতিক নীতি স্বামীৰ সমালোচনাৰ কেন্দ্ৰবিন্দু হৈ আছে ।
লগতে পঢ়ক :ৰাম মন্দিৰৰ নিমন্ত্ৰণ নাকচ কংগ্ৰেছৰ; বিজেপি-আৰ এছ এছৰ অনুষ্ঠান আখ্যা
