তীব্ৰ গতিৰ বতাহে পৰিষ্কাৰ কৰিছে দিল্লীৰ বায়ু

ক্ৰমাৎ উন্নত হৈছে দিল্লীৰ বায়ুৰ গুণগত মান । শুক্ৰবাৰে পুৱা ৯ বজাত বায়ুৰ গুণগত মানৰ সূচাংক ১৩১ । বতাহৰ গতিবেগ বৃদ্ধিৰ লগে লগে স্বচ্ছ হৈ পৰিছে দিল্লীৰ আকাশ ।

নেশ্যনেল ডেস্ক, ২৭ নৱেম্বৰ: জটিলৰ পৰা মধ্যম শ্ৰেণীলৈকে উন্নীত হৈছে দিল্লীৰ বায়ুৰ গুণগত মানৰ সূচাংক । বতাহৰ গতিবেগ বঢ়াৰ বাবে ক্ৰমাৎ হ্ৰাস পাইছে প্ৰদূষণৰ মাত্ৰা আৰু ইয়াতকৈও অধিক হ্ৰাস পোৱাৰ সম্ভাৱনা আছে । ৰাজধানী চহৰখনত বায়ুৰ গুণগত মানৰ সূচাংক বৃহস্পতিবাৰে আবেলি ৪ বজাত ৩০২ আছিল । শুক্ৰবাৰে দিল্লীত বায়ুৰ গুণগত মানৰ সূচাংক ১৩১ লৈ উন্নীত হয় ।

বুধবাৰে ২৪ ঘণ্টাত বায়ুৰ গুণগত মানৰ সূচাংক আছিল ৪১৩ আৰু জটিল শ্ৰেণীৰ ভিতৰত পৰে । বায়ুৰ গুণগত মানৰ সূচাংক ০-৫০ৰ ভিতৰত থাকিলে ভাল, ৫১-১০০ৰ ভিতৰত সন্তোষজনক, ১০১-২০০ৰ ভিতৰত মধ্যম, ২০১-৩০০ৰ ভিতৰত বেয়া, ৩০১-৪০০ৰ ভিতৰত বহুত বেয়া আৰু ৪০১-৫০০ৰ ভিতৰত থাকিলে জটিল পৰিস্থিতি বুলি গণ্য কৰা হয় । বতাহৰ গতি বৃদ্ধি আৰু জাবৰ-জোথৰ জ্বলোৱাৰ পৰিমাণ হ্ৰাস পোৱাৰ বাবেই দিল্লীত পৰিষ্কাৰ আকাশ দেখিবলৈ পোৱা গৈছে । সাধাৰণতে, নিশা বতাহৰ গতিবেগ যথেষ্ট কম হৈ থাকে ।

বৃহস্পতিবাৰে নিশা প্ৰতি ঘণ্টাত ৮-১২ কিলোমিটাৰ বেগত বতাহ বলে । ভাৰতীয় বতৰ বিজ্ঞান বিভাগৰ পৰিৱেশ গৱেষণা কেন্দ্ৰৰ অধ্যক্ষ ভি কে সোনীয়ে এই কথা প্ৰকাশ কৰে । বিভাগটোৱে অনুমান কৰা মতে, শুক্ৰবাৰে দিনটোত বতাহৰ গতিবেগ প্ৰতি ঘণ্টাত ১৪ কিলোমিটাৰ থাকিব । শস্য চপোৱাৰ সময় অন্ত পৰাৰ বাবে দিল্লীত পেলনীয়া সমগ্ৰী জ্বলোৱাৰ পৰিমাণ বৰ্তমান যথেষ্ট হ্ৰাস পাইছে । ভাৰতীয় বতৰ বিজ্ঞান বিভাগৰ তথ্য অনুসৰি দিল্লীৰ তাপমাত্ৰা ২৫ ডিগ্ৰী চেলছিয়াছৰ আশে পাষে থকাৰ সম্ভাৱনা আছে ।

লগতে পঢ়ক:কুটুহাৰ ভগামূৰত একেলগে দপদপাই জ্বলিল ৫ খনকৈ চিতা