নিউজ ডেস্ক, 19 অক্টোবৰ: ছিকিমৰ বানাক্ৰান্তক সহায়ৰ বাবে আগবাঢ়ি আহিছে ক্ৰীড়া জগতৰ খেলুৱৈসকলো । এই লোকসকলক সহায় কৰিবলৈ খেলুৱৈসকলে ক্ৰীড়াৰ জৰিয়তে ধন সংগ্ৰহৰ পৰিকল্পনা কৰিছে । এই অভিযানক ভাৰতীয় ফুটবল দলৰ প্ৰাক্তন অধিনায়ক বাইচুং ভূটিয়াই মেচৰ জৰিয়তে আগুৱাই লৈ গৈছে । ছিকিমৰ বানাক্ৰান্তক সহায়ৰ বাবে ভূটিয়াই শিলিগুৰিত এছ’চিয়েশ্যন ফৰ কনজাৰ্ভেচন এণ্ড ট্যুৰিজমৰ সহায়ত এখন চেৰিটি ফুটবল খেলৰ আয়োজন কৰিছিল ।
ভাৰতীয় হকী দলৰ প্ৰাক্তন অধিনায়ক ধনৰাজ পিল্লাই আৰু ৫ বাৰৰ বিশ্ব চেম্পিয়ন তথা অলিম্পিক ২০১২ ৰ ব্ৰঞ্জ বিজয়ী বক্সাৰ মেৰী কমেও এই মেচত অংশগ্ৰহণ কৰে । বানত সকলো হেৰুওৱা লোকসকলক চেৰিটি মেচৰ জৰিয়তে ধন সংগ্ৰহ কৰি থকা সহায় কৰিবলৈ আগবাঢ়ি আহিছে খেলুৱৈসকল । বাইচুং ভূটিয়া, মেৰী কম আৰু ধনৰাজ পিল্লায়ে ফুটবল খেলৰ জৰিয়তে ছিকিমৰ বাবে ২ লাখ ৫০ হাজাৰ টকা আগবঢ়াইছে ।
আপোনালোকক জনাওঁ যে বুধবাৰে বিয়লি শিলিগুৰিত বাইচুং একাদশ বনাম মেৰী কম-ধনৰাজ পিল্লাই একাদশৰ মাজত এখন ফুটবল খেল অনুষ্ঠিত হয় । ধনৰাজ পিল্লাইৰ উপৰিও পূব বংগৰ প্ৰাক্তন খেলুৱৈ মঞ্জিত সিঙেও মেৰী কম দলৰ হৈ খেলপথাৰত নামিছিল । এই খেলখনত ধনৰাজ পিল্লায়ে ৪ টা গ’ল দিয়াৰ বিপৰীতে বাচুং ভূটিয়াইও ৪ টা গ’ল দিয়ে । এই মেচখনত মেৰী কমৰ দলটোৱে ১০-৯ গ’লত জয়লাভ কৰে । খেলখনত এই ভাৰতীয় খেলুৱৈসকলে হকী ষ্টিক আৰু বক্সিং গ্লভছ এৰি বানাক্ৰান্ত লোকসকলৰ বাবে ধন সংগ্ৰহ কৰে ।
এই সন্দৰ্ভত মেৰী কমে কয়, ‘‘ছিকিম এক ভয়ংকৰ দুৰ্যোগত বিধ্বস্ত হৈছে । সেয়ে বাইচুঙে মোক ছিকিমৰ দূৰ্গতৰ সৈতে থিয় হ’বলৈ আহ্বান জনালে ৷ মই খেলিবলৈ পাই সুখী হৈছো । আমি সকলো সুস্থ হোৱাটো বিচাৰোঁ ।’’ মেৰী কম আৰু ধনৰাজ পিল্লাই বাইচুং ভূটীয়াৰ উদ্যোগত ‘প্লে ফৰ টিষ্টা’ৰ জৰিয়তে ছিকিমৰ বানাক্ৰান্ত ৰাইজক সহায় কৰিছে । এতিয়ালৈকে এই বানত মৃত্যু হোৱা লোকৰ সংখ্যা ৫৬ জন হৈছেগৈ । এই বানত ২২ জন সেনা জোৱানো নিৰুদ্দেশ হৈছিল, ইয়াৰে কিছুমানৰ মৃতদেহ এতিয়াও উদ্ধাৰ হোৱা নাই ।
লগতে পঢ়ক:World Cup 2023: বাংলাদেশৰ বিৰুদ্ধে 7 উইকেটত জয়ী মেন ইন ব্লু
