নেশ্যনেল ডেস্ক, ১৬ জুলাই :পঞ্জাৱ কংগ্ৰেছত পুনৰ উত্তেজনা বৃদ্ধি পাইছে । পঞ্জাৱ কংগ্ৰেছ কমিটিৰ সভাপতি হিচাপে নৱজোট সিং সিদ্ধুক কেন্দ্ৰীয় নেতৃত্বই ঘোষণা কৰিব বুলি খবৰ ওলোৱাৰ পিছতে দলৰ ভিতৰচ'ৰাত তীব্ৰ অসন্তুষ্টি দেখিবলৈ পোৱা গৈছে । বিশেষকৈ প্ৰাক্তন সহকৰ্মী তথা পঞ্জাৱৰ মুখ্যমন্ত্ৰী কেপ্তেইন অমৰিন্দৰ সিঙে (Punjab Chief Minister Amarinder Singh) নিজৰ অসন্তুষ্টি প্ৰকাশ কৰা দেখা গৈছে ।
নৱজোট সিং সিদ্ধুক পঞ্জাৱ প্ৰদেশ কংগ্ৰেছ কমিটিৰ (PCC) মুৰব্বী হিচাপে মনোনীত কৰা হ'ব বুলি চৰ্চা চলি থকাৰ মাজতে নৱজোট সিং সিদ্ধুৱে সাক্ষাৎ কৰে দলৰ মুৰব্বী ছোনিয়া গান্ধীক (Sonia Gandhi) । শুকুৰবাৰে পুৱাই নতুন দিল্লীত থকা ছোনিয়া গান্ধীৰ বাসগৃহত উপস্থিত হয় প্ৰাক্তন ক্ৰিকেটাৰ তথা কংগ্ৰেছ নেতা নৱজোট সিং সিদ্ধু । জানিব পৰা মতে, দলটোৰ পঞ্জাৱৰ ভাৰপ্ৰাপ্ত সাধাৰণ সম্পাদক হৰিশ ৰাৱটেও (Harish Rawat) শীঘ্ৰেই ছোনিয়া গান্ধীক সাক্ষাৎ কৰিব ।
দলটোৰ সূত্ৰ অনুসৰি, কংগ্ৰেছে সিদ্ধুক নতুন পিচিচি সভাপতি হিচাপে ঘোষণা কৰিব । সিদ্ধুক দুগৰাকী কাৰ্যকৰী সভাপতিৰ সৈতে নতুন পিচিচি সভাপতি হিচাপে নিযুক্তি দিয়া হ'ব । বৰ্তমান পঞ্জাৱ কংগ্ৰেছৰ নেতৃত্বত থকা সুনীল জাখৰক (Sunil Jakhar) সৰ্বভাৰতীয় কংগ্ৰেছ সমিতিত স্থান দিয়া হ'ব বুলি সূত্ৰটোৱে জানিবলৈ দিয়ে ।