নিউজ ডেস্ক, ৬ জুলাই : মধ্যপ্ৰদেশৰ প্ৰস্ৰাৱ কাণ্ডত বিৰোধীৰ আক্ৰমণক প্ৰতিহত কৰাৰ প্ৰচেষ্টাৰে মুখ্যমন্ত্ৰী শিৱৰাজ সিং চৌহানে বুধবাৰে ভুক্তভোগী জনজাতীয় লোকজনৰ ভৰি ধুৱাই দিয়ে । উল্লেখ্য, দুদিন পূৰ্বে এইগৰাকী ব্যক্তিৰ মুখত ৰাজ্যখনৰ এজন তথাকথিত বিজেপি নেতাই প্ৰস্ৰাৱ কৰিছিল । যাৰ বাবে তেওঁ এক ভয়ংকৰ লাঞ্ছনাৰ সন্মুখীন হ'বলগা হৈছিল আৰু এই ঘটনাটোৱে সমগ্ৰ দেশজুৰি প্ৰতিক্ৰিয়াৰ সৃষ্টি কৰিছিল । ইতিমধ্যে মুখ্যমন্ত্ৰীগৰাকীয়ে তেওঁৰ এই কাৰ্যৰ ফটো তেওঁৰ টুইটাৰ হেণ্ডেলত শ্বেয়াৰ কৰিছে । আনহাতে, শিৱৰাজ সিং চৌহানৰ ভৰি ধুৱাই থকা এটা ভিডিঅ' সংবাদ মাধ্যমৰ সৈতেও শ্বেয়াৰ কৰিছে ।
জনজাতীয় ব্যক্তিজনক সন্মান জনোৱা এই অনুষ্ঠানটো বৃহস্পতিবাৰে মুখ্যমন্ত্ৰীৰ চৰকাৰী বাসভৱনত অনুষ্ঠিত হয় । আনহাতে, ঘটনাটোৰ বাবে চৌহানে ব্যক্তিগতভাৱে লোকজনৰ ওচৰত ক্ষমা বিচাৰে আৰু তেওঁৰ আন্তৰিক অনুশোচনাও প্ৰকাশ কৰিবলৈ চেষ্টা কৰে । মুখ্যমন্ত্ৰীয়ে লোকজনৰ ভৰি ধুৱাবলৈ আগবাঢ়ি গৈ শ্ৰদ্ধাৰে তেওঁৰ কপালত হাত বুলাই দিয়ে ।
ইয়াৰ উপৰি লোকজনৰ কপালত তিলকো প্ৰদান কৰে মুখ্যমন্ত্ৰীয়ে । লগতে তেওঁৰ ডিঙিত মালা পিন্ধাই সন্মান প্ৰদৰ্শন কৰে । আনহাতে, তেওঁৰ সদিচ্ছা আৰু আশীৰ্বাদৰ প্ৰতীক স্বৰূপে জনজাতীয় লোকজনক উপহাৰ হিচাপে ভগৱান গণেশৰ এটা মূৰ্তিও প্ৰদান কৰে । "মনটো দুখী; দশমতজী, এইটো আপোনাৰ বেদনা ভাগ কৰি লোৱাৰ বাবে কৰা এটা প্ৰয়াস । মই আপোনাৰ ওচৰত ক্ষমাও বিচাৰিছোঁ, মোৰ বাবে ৰাইজে ভগৱান !" চৌহানে কয় ।