নিউজ ডেস্ক, 5 জুলাই : বাংলাদেশৰ এক বিশেষ আমৰ সোৱাদ লাভ কৰিব প্ৰধানমন্ত্ৰী নৰেন্দ্ৰ মোদী(PM Modi), পশ্চিমবংগৰ মুখ্যমন্ত্ৰী মমতা বেনাৰ্জী(West Bengal Chief Minister Mamata Banerjee) আৰু ত্ৰিপুৰাৰ মুখ্যমন্ত্ৰী বিপ্লৱ কুমাৰ দেবে ৷ দেওবাৰে চুবুৰীয়া ৰাষ্ট্ৰখনৰ প্ৰধান মন্ত্ৰী শ্বেইখ হাছিনাই (Bangladesh PM Sheikh Hasina) বাংলাদেশৰ প্ৰখ্যাত হাৰিভাংগা আম ভাৰতলৈ প্ৰেৰণ কৰে ৷ এখন ট্ৰাকৰ যোগে পঠিওৱা এই 2600 কিলোগ্ৰাম আম পোন প্ৰথমে গ্ৰহণ কৰে কলকাত থকা বাংলাদেশৰ ডেপুটি হাইকমিচনৰ(deputy high comission of Bangladesh) প্ৰথম ৰাজনৈতিক সচিৱ মহম্মদ চামিউল কুৱাদেৰে ৷
প্ৰাচীন কালৰে পৰা বন্ধু ৰাষ্ট্ৰৰ মাজত উপহাৰৰ আদান প্ৰদান হোৱাটো সুস্থ কুটনীতিৰ অংশ হিচাপে ব্যৱহৃত হৈ আহিছে ৷ ৰাজদূতৰ জৰিয়তে বন্ধু ৰাষ্ট্ৰৰ শাসকলৈ ৰজা মহাৰজা সকলে প্ৰেৰণ কৰিছিল বিভিন্ন উপহাৰ ৷ভাৰত আৰু চুবুৰীয়া ৰাষ্ট্ৰ বাংলাদেশৰ কুটনৈতিক সম্পৰ্ক ৰক্ষাৰ দিশত সোমবাৰে বাংলাদেশৰ ৰংপুৰ অঞ্চলৰ পৰা বেনাপল বন্দৰৰ মাজেৰে ভাৰতলৈ অহা এই বিশেষ আমখিনিয়েও যেন অনুৰূপ ঘটনাৰে পুনৰাবৃত্তি কৰিলে ৷
ইতিমধ্যে, ত্ৰিপুৰাৰৰ মুখ্যমন্ত্ৰী বিপ্লৱ কুমাৰ দেৱে বিশেষ আমখিনি প্ৰেৰণ কৰাৰ বাংলাদেশৰ প্ৰধানমন্ত্ৰী গৰাকীক টুইটাৰ যোগে সৌহাদ্যমূলক ধন্যবাদ জ্ঞাপন কৰি কয় যে, বাংলাদেশৰ প্ৰধানমন্ত্ৰী শ্বেইখ হাছিনাই প্ৰেৰণ কৰা আমখিনি লাভ কৰি তেওঁ আনন্দ অনুভৱ কৰিছে আৰু ভাৰতবৰ্ষৰ প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰত-বাংলাদেশৰ মৈত্রীৰ সম্পৰ্ক অটুত থকাৰ কথা তেওঁ কামনা কৰিছে ৷