বিজয় সংকল্প মহাসম্পৰ্ক যাত্ৰাত অংশ ল'ব অমিত শ্বাহে

পুনৰ তামিলনাডু আৰু কেৰালালৈ যাব কেন্দ্ৰীয় গৃহ মন্ত্ৰী অমিত শ্বাহ । ৬ এপ্ৰিলত নিৰ্বাচন অনুষ্ঠিত হ'ব দুয়োখন ৰাজ্যতে । দেওবাৰে তামিলনাডু আৰু কেৰালাত বিজেপিৰ বিজয় সংকল্প মহাসম্পৰ্ক যাত্ৰাত অংশগ্ৰহণ কৰিব কেন্দ্ৰীয় গৃহ মন্ত্ৰীগৰাকীয়ে ।

নেশ্যনেল ডেস্ক,৬ মাৰ্চ: নিৰ্বাচনৰ প্ৰাকক্ষণত সঘনে তামিলনাডু আৰু কেৰালালৈ অহা-যোৱা চলিছে বিজেপিৰ কেন্দ্ৰীয় নেতৃত্বৰ । দেওবাৰে পুনৰ দুয়োখন ৰাজ্য ভ্ৰমণ কৰিব কেন্দ্ৰীয় গৃহ মন্ত্ৰী অমিত শ্বাহে । কেন্দ্ৰীয় মন্ত্ৰীগৰাকীৰ এই ভ্ৰমণে বিজেপিৰ নিৰ্বাচনী প্ৰচাৰৰ ক্ষেত্ৰত বিজেপি কৰ্মীসকলক উৎসাহিত কৰিব বুলি আশা ব্যক্ত কৰা হৈছে । দেওবাৰে তামিলনাডুত বিজয় সংকল্প মহাসম্পৰ্ক যাত্ৰাত অংশ ল'ব অমিত শ্বাহে ।

দলৰ এক সূত্ৰই জনোৱা মতে, কেন্দ্ৰীয় গৃহ মন্ত্ৰীগৰাকীয়ে পুৱা ১০.২০ বজাত কন্যাকুমাৰীস্থিত ছুচিন্দ্ৰম মন্দিৰত সেৱা জনাব । পিছত ছুচিন্দ্ৰম চহৰত 'বিজয় সংকল্প মহাসম্পৰ্ক যাত্ৰা' উদ্বোধন কৰিব কৰিব মন্ত্ৰী শ্বাহে । এই অভিযানত দলৰ কৰ্মীসকলে ঘৰে ঘৰে গৈ জন সাধাৰণৰ সৈতে কেন্দ্ৰীয় চৰকাৰৰ নীতিৰ বিষয়ে আলোচনা কৰিব আৰু বিজেপিৰ দৃষ্টিভংগী সম্পৰ্কে বুজাবলৈ প্ৰয়াস কৰিব ।

ইয়াৰ পিছত দিনৰ ১১.১৫ বজাত হিন্দু মহাবিদ্যালয়ৰ পৰা কামৰাজ প্ৰতিমূৰ্তিলৈকে এক ৰোড শ্ব’ৰ নেতৃত্ব দিব অমিত শ্বাহে । ১২.৩০ বজাত কন্যাকুমাৰীৰ উড়ুপী হোটেলত অনুষ্ঠিত এক সভাত দলীয় কৰ্মীসকলক সম্বোধন কৰিব । এই অনুষ্ঠানৰ অন্তত কেন্দ্ৰীয় মন্ত্ৰীগৰাকীয়ে কেৰালালৈ যাত্ৰা কৰিব । আবেলি ৪.৩০ বজাত অমিত শ্বাহে তিৰুৱনন্তপুৰমৰ শ্ৰীৰামকৃষ্ণ মঠ ভ্ৰমণ কৰিব আৰু বিজেপিৰ 'বিজয় সংকল্প মহাসম্পৰ্ক যাত্ৰা'তো অংশগ্ৰহণ কৰিব ।

লগতে পঢ়ক: মুম্বাইত অভিনেত্ৰীক ধৰ্ষণৰ অভিযোগ