নেশ্যনেল ডেস্ক, ২৯ জুন: ইউৰোপীয় ইউনিয়নৰ ডিজিটেল গ্ৰীণ প্ৰমাণপত্ৰৰ বাবে অযোগ্য বুলি বিবেচিত হৈছে ক'ভিশ্বিল্ড প্ৰতিষেধক । বিবিচি(BBC)য়ে প্ৰকাশ কৰা তথ্য অনুসৰি, ছিৰাম ইনষ্টিটিউট অৱ ইণ্ডিয়াই ইউৰোপীয় ইউনিয়নত ক'ভিশ্বিল্ড প্ৰতিষেধক জৰুৰীকালীনভাৱে প্ৰদানত অনুমোদন জনাবলৈ আহ্বান জনাইছে । ক'ভিশ্বিল্ড প্ৰতিষেধক ব্যৱহাৰত অনুমোদন নজনালে ইউৰোপীয় দেশ ভ্ৰমণৰ ক্ষেত্ৰত একাংশ লোকে বাধাৰ সন্মুখীন হ'ব । প্ৰমাণপত্ৰখন বৰ্তমান কেৱল ইউৰোপীয় ইউনিয়নৰ নাগৰিককহে প্ৰদান কৰা হ'ব ।
ক'ভিশ্বিল্ড হৈছে এষ্ট্ৰা জেনেকাৰ ভেক্সজেভ্ৰিয়া প্ৰতিষেধকৰ ভাৰতত নিৰ্মিত সংস্কৰণ । ভেক্সজেভ্ৰিয়া ব্যৱহাৰৰ বাবে ইউৰোপীয় ইউনিয়নত কৰ্তৃত্ব দিয়া হৈছে । বিশ্বৰ সৰ্ববৃহৎ প্ৰতিষেধক প্ৰস্তুত কৰোঁতা ছিৰাম ইনষ্টিটিউট অৱ ইণ্ডিয়াই ভাৰতত ক'ভিশ্বিল্ড প্ৰস্তুত কৰিছে । বৰ্তমান ডিজিটেল গ্ৰীণ প্ৰমাণপত্ৰৰ বাবে যোগ্য বুলি বিবেচিত হোৱা প্ৰতিষেধকবোৰক ইউৰোপীয় ঔষধ সংস্থা (ইএমএ)ই অনুমোদন জনাইছে ।
ছিৰামৰ মুখ্য কাৰ্যবাহী বিষয়া আদাৰ পুনাৱালাই সোমবাৰে জনাইছিল যে, কোম্পানীটোৱে শীঘ্ৰেই এই সমস্যা সমাধান কৰিব বুলি আশা কৰিছে । লগতে তেওঁ কয় যে, ক'ভিশ্বিল্ডক এতিয়ালৈকে ইউৰোপীয় ইউনিয়নত কৰ্তৃত্ব দিয়া হোৱা নাই । ইউৰোপীয় ঔষধ সংস্থা সোমবাৰে বিবিচিক কয় যে, ছিৰাম ইনষ্টিটিউটে এতিয়াও অনুমোদনৰ বাবে আবেদন জনোৱা নাই ।