বাহনৰ আসনত এয়াৰবেগ সংলগ্ন কৰাৰ সময়সীমা ৩১ ডিচেম্বৰলৈকে স্থগিত

বৰ্তমান চলি থকা মডেলৰ বাহনৰ সন্মুখৰ আসনত এয়াৰবেগ(Airbags) সংলগ্ন কৰাৰ সময়সীমা ৩১ ডিচেম্বৰলৈকে স্থগিত কৰিলে পথ পৰিবহণ মন্ত্ৰালয়ে (Road transport ministry) । বাহনৰ সন্মুখৰ আসনত এয়াৰবেগ সংলগ্ন কৰাতো পথ পৰিবহণ মন্ত্ৰালয়ে বাধ্যতামূলক কৰিছিল । ক'ভিডসৃষ্ট পৰিস্থিতিৰ পৰিপ্ৰেক্ষিতত এয়াৰবেগ সংলগ্ন কৰাৰ সময় চাৰি মাহ পিছুৱাই দিয়া হৈছে ।

নেশ্যনেল ডেস্ক, ২৮ জুন: ক'ভিড-১৯ (Covid 19)ৰ সংক্ৰমণ অব্যাহত থকাৰ পৰিপ্ৰেক্ষিতত বৰ্তমান চলি থকা মডেলৰ বাহনৰ সন্মুখৰ আসনত দ্বৈত এয়াৰবেগ (dual airbag) সংলগ্ন কৰাৰ সময়সীমা বঢ়াই দিয়াৰ সিদ্ধান্ত লৈছে পথ পৰিবহণ মন্ত্ৰণালয়ে (Road transport ministry) । দেওবাৰে বিভাগটোৰ এজন জ্যেষ্ঠ বিষয়াই এই কথা জানিবলৈ দিয়ে । ৩১ ডিচেম্বৰ পৰ্যন্ত বৰ্তমান চলি থকা গাড়ীৰ মডেলবোৰত কেৱল চালকৰ আসনৰ এয়াৰবেগহে বাধ্যতামূলক ।

বিষয়াগৰাকীয়ে জনোৱা মতে, ক'ভিডসৃষ্ট পৰিস্থিতিৰ পৰিপ্ৰেক্ষিতত এয়াৰবেগ সংলগ্ন কৰাৰ সময় চাৰি মাহ পিছুৱাই দিয়া হৈছে । তেওঁ লগতে কয় যে, ছ'চাইটি অৱ অটোমোবাইল মেনুফেক্সাৰাৰ্ছে কিছু সময় বিচাৰিছে । আনহাতে, আগন্তুক যিকোনো নতুন মডেলৰ বাহনৰ ক্ষেত্ৰত সন্মুখৰ আসনত দ্বৈত এয়াৰবেগ ( dual airbags) সংলগ্ন কৰাতো বাধ্যতামূলক ।

উল্লেখ্য যে, মন্ত্ৰালয়ে যোৱা ৬ মাৰ্চত নিৰ্দেশ দিছিল যে, নতুন মডেলৰ গাড়ীৰ ক্ষেত্ৰত চলিত বৰ্ষৰ ১ এপ্ৰিল আৰু তাৰ পিছত নিৰ্মাণ কৰা বাহনবোৰত ৩১ আগষ্টৰ ভিতৰত চালকৰ উপৰিও সন্মুখৰ আসনত বহা ব্যক্তিজনৰ বাবে বাধ্যতামূলকভাৱে এয়াৰবেগ সংলগ্ন কৰা হ'ব ।

দুৰ্ঘটনাৰ সময়ত যাত্ৰীৰ সুৰক্ষাৰ উদ্দেশ্যেৰে এই পদক্ষেপ লোৱা হৈছে । দুৰ্ঘটনাৰ সময়ত যাতে কোনো যাত্ৰী গুৰুতৰভাৱে আহত নহয় অথবা মৃত্যুমুখত পৰিবলগীয়া নহয়, তাৰ বাবে এয়াৰবেগ লগোৱাতো বাধ্যতামূলক কৰিছিল পথ পৰিবহণ মন্ত্ৰালয়ে । এয়াৰবেগ সংলগ্ন হৈ থাকিলে দুৰ্ঘটনা সংঘটিত হ'লেও ভয়ৱহতাৰ আশংকা বহুখিনি কম হয় ।

সেয়ে, গাড়ী নিৰ্মাতাসকলক এই নিৰ্দেশনা দিছে বিভাগটোৱে । ছ'চাইটি অৱ অটোমোবাইল মেনুফেক্সাৰাৰ্ছে এই নিৰ্দেশনাৰ ওপৰত কেনেদৰে গুৰুত্ব দিয়ে সেয়া সময়ত লক্ষ্যণীয় হ'ব ।

লগতে পঢ়ক:পশ্চিমবংগৰ নিৰ্বাচনোত্তৰ হিংসাৰ ভুক্তভোগীক অভিযোগ দাখিলৰ বাবে আমন্ত্ৰণ