নেশ্যনেল ডেস্ক, ২৮ জুলাই:তাজিকিস্তানৰ ৰাজধানী দুশাবেনত চাংহাই সহযোগিতা সংস্থাৰ(SCO) দ্বাৰা আয়োজিত এক সন্মিলনত বুধবাৰে উপস্থিত থাকে ভাৰতৰ প্ৰতিৰক্ষা মন্ত্ৰী ৰাজনাথ সিং । য'ত আঞ্চলিক নিৰাপত্তা প্ৰত্যাহ্বানৰ লগতে আফগানিস্তানৰ পৰিস্থিতিৰ ওপৰত ব্যাপকভাৱে আলোচনা কৰা হয় । এই সন্মিলনত চাংহাই সহযোগিতা সংস্থাৰ (Shanghai Cooperation Organisation) আঠ সদস্য ৰাষ্ট্ৰৰ প্ৰতিৰক্ষা মন্ত্ৰীসকল উপস্থিত থাকে ।
মঙলবাৰে তিনিদিনীয়া ভ্ৰমণসূচীৰে মন্ত্ৰীগৰাকী তাজিকিস্তানৰ ৰাজধানী চহৰত উপস্থিত হৈছিল । সন্মিলনৰ পূৰ্বে সিঙে বেলাৰুছৰ প্ৰতিৰক্ষা মন্ত্ৰী লেফটেনেণ্ট জেনেৰেল ভিক্টৰ খ্ৰেনিনৰ (Lt Gen Viktor Khrenin) সৈতে দ্বিপাক্ষিক আলোচনাত মিলিত হয় আৰু ৰাছিয়াৰ প্ৰতিৰক্ষা মন্ত্ৰী জেনেৰেল ছেৰ্গেই শ্বয়গুৰ (Gen Sergey Shoygu) সৈতেও বাৰ্তালাপ কৰে । ইয়াৰ পাছতে ৰাছিয়াত থকা ভাৰতীয় দূতাবাসে দুয়োগৰাকী নেতাৰ ফটোৰ সৈতে বিশেষ টুইট কৰা দেখা যায় ।
ইফালে সন্মিলন সন্দৰ্ভত প্ৰতিৰক্ষা মন্ত্ৰীৰ কাৰ্যালয়ে ফটো শ্বেয়াৰ কৰি এক টুইটত কয় যে, সন্মিলনত সিঙে সন্ত্ৰাসবাদকে ধৰি আঞ্চলিক নিৰাপত্তা প্ৰত্যাহ্বান আৰু সেইবোৰৰ সৈতে মোকাবিলা কৰাৰ উপায়সমূহৰ বিষয়ে আলোচনা কৰিব । প্ৰতিৰক্ষা মন্ত্ৰীগৰাকীয়ে দ্বিপাক্ষিক তথা পাৰস্পৰিক স্বাৰ্থৰ অন্যান্য বিষয়ৰ ওপৰত আলোচনা কৰিবলৈ তাজিকিস্তানৰ প্ৰতিৰক্ষা মন্ত্ৰী কৰ্ণেল জেনেৰেল শ্বেৰালী মিৰ্জোকো (Col Gen Sherali Mirzo) সাক্ষাৎ কৰিব বুলি টুইটত উল্লেখ কৰা হৈছে । সন্মিলনত চীনৰ প্ৰতিৰক্ষা মন্ত্ৰী ৱেই ফেংহেও (Wei Fenghe) অংশগ্ৰহণ কৰে ।