নিউজ ডেস্ক, ২৩ নৱেম্বৰ : ২৫ নৱেম্বৰত অনুষ্ঠিত হ'ব ৰাজস্থান বিধানসভাৰ নিৰ্বাচন । তাৰ বাবে প্ৰচাৰ অভিযান এতিয়া চূড়ান্ত পৰ্যায়ত আছে । আনহাতে, বৃহস্পতিবাৰে সন্ধিয়া অন্ত পৰিব প্ৰচাৰ অভিযানৰ । এনে পৰিস্থিতিত আজিৰ দিনটোত সকলো ৰাজনৈতিক দলেই তেওঁলোকৰ সম্পূৰ্ণ শক্তি প্ৰয়োগ কৰি প্ৰচাৰ কাৰ্যত নামি পৰিব ।
প্ৰচাৰৰ এই অন্তিম পৰ্যায়ত বিজেপিৰ সকলো ডাঙৰ ডাঙৰ নেতায়ে বিভিন্ন বিধানসভা সমষ্টিত ৰাজহুৱা সভা আৰু ৰোড শ্ব'ৰ জৰিয়তে দলটোৰ সপক্ষে এক পৰিৱেশ সৃষ্টি কৰিবলৈ চেষ্টা কৰিব । প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় প্ৰতিৰক্ষা মন্ত্ৰী ৰাজনাথ সিং, মুখ্যমন্ত্ৰী যোগী আদিত্যনাথকে ধৰি কেইবাজনো কেন্দ্ৰীয় নেতাই বৃহস্পতিবাৰে নিৰ্বাচনী প্ৰচাৰৰ দায়িত্ব গ্ৰহণ কৰিব ।
ৰাজস্থান বিধানসভা নিৰ্বাচনৰ প্ৰচাৰৰ অন্তিম দিনটোত প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে দুপৰীয়া ১২.৩০ বজাত আৰজি ষ্টেডিয়াম দেওগড়ত এখন ৰাজহুৱা সভা সম্বোধন কৰিব । একেদৰে কেন্দ্ৰীয় গৃহ মন্ত্ৰী অমিত শ্বাহে পুৱা ১১ বজাত হোটেল ললিতত সংবাদ মাধ্যমক সম্বোধন কৰিব । ইয়াৰ পিছত তেওঁ নিম্বাহেৰাত এখন ৰাজহুৱা সভা অনুষ্ঠিত কৰিব । মহাৰাষ্ট্ৰৰ উপ-মুখ্যমন্ত্ৰী দেৱেন্দ্ৰ ফাড়নভিশে সংগনাৰ আৰু আদৰ্শ নগৰ অঞ্চলত ৰোড শ্ব' অনুষ্ঠিত কৰিব ।