নিউজ ডেস্ক, ২৩ নৱেম্বৰ:তিৰুচিৰাপল্লীস্থিত গহনা গোটৰ বিৰুদ্ধে ১০০ কোটি টকাৰ পঞ্জি আৰু জালিয়াতিৰ গোচৰৰ সৈতে জড়িত ধন সৰবৰাহৰ গোচৰত অভিনেতা প্ৰকাশ ৰাজক জেৰাৰ বাবে তলব কৰিছে প্ৰৱৰ্তক সঞ্চালকালয়ে ৷ বৃহস্পতিবাৰে চৰকাৰী সূত্ৰই প্ৰকাশ কৰিছে এই কথা ।
তদন্তটো তিৰুচিৰাপল্লীস্থিত অংশীদাৰী প্ৰতিষ্ঠান প্ৰণৱ জুৱেলাৰ্ছৰ বিৰুদ্ধে থকা গোচৰৰ সৈতে জড়িত ৷ য’ত ইডিয়ে যোৱা ২০ নৱেম্বৰত অভিযান চলাই ২৩.৭০ লাখ “অস্পষ্ট” নগদ ধন আৰু কিছু সোণৰ গহনা জব্দ কৰা বুলি দাবী কৰিছিল । ৰাষ্ট্ৰীয় বঁটা বিজয়ী অভিনেতা ৰাজে (৫৮) এই কোম্পানীটোৰ ব্ৰেণ্ড এম্বেছাদৰ হিচাপে কাম কৰি আহিছে । ডিচেম্বৰৰ প্ৰথম সপ্তাহত চেন্নাইৰ ফেডাৰেল এজেন্সীৰ আগত তেওঁক উপস্থিত হ’বলৈ কোৱা হৈছে ।
সূত্ৰ অনুসৰি ইডিয়ে তেওঁৰ বক্তব্য লিপিবদ্ধ কৰিব বিচাৰে আৰু বেংগালুৰুস্থিত অভিনেতা তথা ৰাজনীতিবিদজনক কোম্পানীটোৱে কৰা কিছুমান কথিত ধন আৰু আন কিছুমান বিত্তীয় লেনদেনৰ বিষয়ে বুজিব বিচাৰে । হিন্দী, কানাড়া, তেলুগু, তামিল চিনেমাত অভিনয় কৰা প্ৰকাশ ৰাজ বিজেপিৰ সমালোচক । ২০১৯ চনৰ লোকসভা নিৰ্বাচনত তেওঁ বেংগালুৰু কেন্দ্ৰীয় আসনৰ পৰা নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰি পৰাস্ত হৈছিল । ইডিৰ গোচৰটো তামিলনাডু আৰক্ষীৰ অৰ্থনৈতিক অপৰাধ শাখাৰ এফআইআৰৰ ভিত্তিত ৰুজু হৈছে ৷