নেশ্যনেল ডেস্ক,১ জুন :চাৰিদিনীয়া ভ্ৰমণসূচীৰে বুধবাৰে অসমত উপস্থিত হৈছে নেপালৰ প্ৰধানমন্ত্ৰী পুষ্প কমল দাহাল ওৰফে প্ৰচণ্ড (Nepal PM Prachanda India visit)। কাৰ্যভাৰ গ্ৰহণৰ পাছত প্ৰধানমন্ত্ৰী দাহালৰ এয়া প্ৰথমটো বিদেশ ভ্ৰমণ । এই ভ্ৰমণৰ সময়ত ভাৰতৰ সৈতে নেপালৰ বাণিজ্যিক সম্পৰ্ক অধিক শক্তিশালী কৰাৰ ক্ষেত্ৰত তেওঁ জোৰ দিব বুলি আশা কৰা হৈছে ।
সূত্ৰৰ মতে বাংলাদেশক বিদ্যুৎ বিক্ৰীৰ বাবে ভাৰতীয় পথৰ জৰিয়তে নেপালে শক্তি পৰিবহণ বাণিজ্যৰ বিষয়টো আলোচনা কৰিব । কিয়নো নেপাল আৰু বাংলাদেশে ভাৰতক শক্তি পৰিবহণ বাণিজ্যৰ অনুমতি দিবলৈ জোৰ দি আহিছে । দ্বিপাক্ষিক আলোচনাৰ সময়ত শক্তিৰ ক্ষেত্ৰত কিছুমান চুক্তি চূড়ান্ত হোৱাৰো সম্ভাৱনা আছে ।
ইফালে প্ৰধানমন্ত্ৰী দাহালে বৃহস্পতিবাৰে প্ৰধানমন্ত্ৰী নৰেন্দ্ৰ মোডীৰ সৈতে বৈঠকত মিলিত হ'ব (Prachanda to meet PM Modi)। তেওঁ ৰাষ্ট্ৰপতি দ্ৰৌপদী মুৰ্মু, উপ-ৰাষ্ট্ৰপতি জগদীপ ধনখড়, বৈদেশিক পৰিক্ৰমা মন্ত্ৰী এছ জয়শংকৰ, ৰাষ্ট্ৰীয় নিৰাপত্তা উপদেষ্টা অজিত ডোভাল আৰু ভাৰতীয় বৈদেশিক সচিব বিনয় মোহন কাৱাট্ৰাকে ধৰি আন কেইবাগৰাকী ব্যক্তিক সাক্ষাৎ কৰিব ।
দাহালে প্ৰধানমন্ত্ৰী মোডীক সাক্ষাৎ কৰাৰ সময়ত দুয়োগৰাকী নেতাৰ মাজত কেইবাটাও চুক্তি স্বাক্ষৰিত হ'ব বুলি আশা কৰা হৈছে । দাহাল আৰু মোডীয়ে দুয়োখন দেশৰ মাজত যোগাযোগ বৃদ্ধিৰ লক্ষ্যৰে এটা ৰে'লৱে য়াৰ্ড আৰু সম্প্ৰসাৰিত ৰে'ল সংযোগ দূৰৱৰ্তীভাৱে উদ্বোধন (Remotely inaugurate) কৰিব বুলি আশা কৰা হৈছে ।