ছত্তীশগড়ত বিজেপিৰ বৃহৎ জয়, প্ৰাক্তন মুখ্যমন্ত্ৰী ডাঃ ৰমন সিঙক লৈ চৰ্চা আৰম্ভ

পূৰ্বে ১৫ বছৰ ধৰি ছত্তীশগড়ত শাসনৰ গাদীত থকা ডাঃ ৰমন সিং পুনৰ চৰ্চালৈ আহিছে । বিজেপিয়ে পুনৰ তেওঁক মুখ্যমন্ত্ৰীৰ দায়িত্ব দিব বুলিও আলোচনা হৈছে ।

নেশ্যনেল ডেস্ক,৪ ডিচেম্বৰ :ছত্তীশগড় বিধানসভা নিৰ্বাচনত বিজেপিৰ বৃহৎ জয়ৰ পাছত পুনৰ এবাৰ চৰ্চালৈ আহিছে প্ৰাক্তন মুখ্যমন্ত্ৰী ৰমন সিং । প্ৰাক্তন মুখ্যমন্ত্ৰী ৰমন সিঙে ৰাজনন্দগাঁও বিধানসভা আসনত একপক্ষীয়ভাৱে বিজয় সাব্যস্ত কৰিছে । তেওঁ কংগ্ৰেছ প্ৰাৰ্থী গিৰিশ দেৱাংগানক ৪৫,০৮৪ টা ভোটৰ বৃহৎ ব্যৱধানত পৰাস্ত কৰিছে । অৱশ্যে ৰাজনৈতিক ক্ষেত্ৰত ৰমন সিঙৰ পৰিচয়ৰ কোনো প্ৰয়োজন নাই । কিন্তু এনেকুৱা কিছুমান বিষয় আছে যাৰ বিষয়ে বহুতে নাজানে ।

ৰমন সিঙৰ জন্ম ১৯৫২ চনৰ ১৫ অক্টোবৰত কবিৰধাম জিলাৰ ৰামপুৰত হৈছিল । ৰমন সিঙৰ পিতৃৰ নাম বিঘ্নহৰণ সিং ঠাকুৰ আৰু মাতৃৰ নাম সুধা সিং । ৰমন সিঙে বীণা সিঙৰ সৈতে বিবাহপাশত আৱদ্ধ হৈছিল । তেওঁলোকৰ দুগৰাকী সন্তান আছে । পুত্ৰৰ নাম অভিষেক সিং । অভিষেক এগৰাকী সাংসদ । ৰমন সিঙৰ এগৰাকী কন্যাও আছে ।

বিজেপি নেতা ৰমন সিঙৰ শৈক্ষিক যাত্ৰা গাঁওৰ পৰাই আৰম্ভ হৈছিল । ৰমন সিঙে আয়ুৰ্বেদিক ঔষধ আৰু শল্য চিকিৎসকৰ (বিএএমএছ) স্নাতক ডিগ্ৰী লাভ কৰিছিল । সেয়েহে মানুহে তেওঁক ডাঃ ৰমন সিং বুলিও জানে । ১৯৭৫ চনত আয়ুৰ্বেদিক ঔষধত বিএএমএছত তেওঁ পিএইচডি ডিগ্ৰী লাভ কৰে আৰু চিকিৎসক হিচাপে সেৱা আগবঢ়াবলৈ আৰম্ভ কৰে ।

তেওঁ ১৯৭৬-৭৭ চনত ৰাজনৈতিক যাত্ৰা আৰম্ভ কৰে আৰু ১৯৮৩-৮৪ চনত কাৱাৰধা পৌৰসভা নিৰ্বাচনত অৱতীৰ্ণ হয় । শীতলা ৱাৰ্ডৰ পৰা তেওঁ কাউন্সিলাৰ হিচাপে নিৰ্বাচিত হৈছিল । কাউন্সিলাৰ হিচাপে ৰাজনৈতিক যাত্ৰা আৰম্ভ কৰিয়ে তেওঁ ৰাজ্যখনৰ মুখ্যমন্ত্ৰী হৈছিল । মুখ্যমন্ত্ৰীৰ পূৰ্বে ১৯৯০ আৰু ১৯৯৩ চনত তেওঁ অবিভক্ত মধ্য প্ৰদেশ বিধানসভাৰ এগৰাকী বিধায়ক হিচাপে নিৰ্বাচিত হৈছিল । ১৯৯৯ চনত তেওঁ লোকসভা নিৰ্বাচনত প্ৰতিদ্বন্দিতা কৰিছিল আৰু জয়ী হৈছিল । ৰমন সিঙে ৰাজনন্দগাঁৱৰ পৰা লোকসভা নিৰ্বাচনত প্ৰতিদ্বন্দিতা কৰিছিল ।

ৰাজনন্দগাঁৱৰ পৰা জয়ী হোৱা ৰমন সিঙৰ প্ৰতিভাৰ দ্বাৰা অটল বিহাৰী বাজপেয়ীও প্ৰভাৱিত হৈছিল । বাজপেয়ীয়ে ৰমন সিঙক কেন্দ্ৰীয় ৰাজ্যিক মন্ত্ৰী হিচাপে দায়িত্ব দিছিল । বাজপেয়ী চৰকাৰত, তেওঁ ১৯৯৯ চনৰ ১৩ অক্টোবৰ পৰা ২০০৩ চনৰ ২৯ জানুৱাৰীলৈ কেন্দ্ৰত বাণিজ্য উদ্যোগ ৰাজ্যিক মন্ত্ৰী আছিল । ২০০০ চনত ছত্তীশগড় ৰাজ্য গঠন হৈছিল । প্ৰথম বিধানসভা নিৰ্বাচন ২০০৩ চনত অনুষ্ঠিত হৈছিল । তেতিয়া ৰমন সিঙক বিজেপিয়ে ছত্তীশগড়ৰ মুখ্যমন্ত্ৰীৰ দায়িত্ব দিয়াৰ সিদ্ধান্ত লৈছিল ।

ডাঃ ৰমন সিং ২০০৩ চনৰ ১ ডিচেম্বৰত ছত্তীশগড়ৰ প্ৰথম নিৰ্বাচিত মুখ্যমন্ত্ৰী হৈছিল । ২০০৮ চনৰ বিধানসভা নিৰ্বাচনত পুনৰ বিজেপিয়ে তেওঁৰ নেতৃত্বত ছত্তীশগড়ত চৰকাৰ গঠন কৰিছিল । ২০১৩ চনতো তেওঁ ৰাজ্যখনৰ মুখ্যমন্ত্ৰী হয় । ডাঃ ৰমন সিঙে প্ৰায় ১৫ বছৰ ধৰি ছত্তীশগড়ৰ মুখ্যমন্ত্ৰীৰ পদত অধিষ্ঠিত আছিল ।

অৱশ্যে ২০১৮ চনত ছত্তীশগড় বিধানসভা নিৰ্বাচনত কংগ্ৰেছৰ হাতত ৰমন সিঙৰ নেতৃত্বৰ বিজেপি পৰাস্ত হয় । ৰাজ্যখনৰ ৯০ খন বিধানসভা আসনৰ ভিতৰত বিজেপিয়ে মাত্ৰ ১৫ খন আসন হে লাভ কৰিছিল । একে সময়তে, কংগ্ৰেছে ২০১৮ চনত ৬৮ খন আসনত ঐতিহাসিক বিজয় সাব্যস্ত কৰে আৰু চৰকাৰ গঠন কৰে । কংগ্ৰেছৰ হাতত এই পৰাজয়ৰ পাছতে ৰমন সিঙে পুনৰ সংগঠনটোক শক্তিশালী কৰাত ব্যস্ত হৈ পৰে । ইফালে, তেওঁক বিজেপিৰ ৰাষ্ট্ৰীয় উপ-সভাপতিৰ দায়িত্বও দিয়া হয় । ৰাজ্যখনত বিজেপিৰ বিজয়ৰ পাছত তেওঁ পুনৰ এবাৰ মুখ্যমন্ত্ৰী হোৱাৰ পূৰ্ণ সম্ভাৱনা আছে ।

লগতে পঢ়ক :কোন হ'ব তেলেংগানাৰ নতুন মুখ্যমন্ত্ৰী, কংগ্ৰেছ বিধায়িনী দলৰ বৈঠকৰ ওপৰত দৃষ্টি নিবদ্ধ সকলোৰে