নেশ্যনেল ডেস্ক, ২৩ ডিচেম্বৰ :ছত্তীশগড়ত মাওবাদীৰ বিৰুদ্ধে নিৰাপত্তাৰক্ষীৰ অভিযান অব্যাহত আছে । ইয়াৰ মাজতে শনিবাৰে সুকমাত নিৰাপত্তাৰক্ষী আৰু মাওবাদীৰ মাজত তীব্ৰ সংঘৰ্ষ হোৱাৰ খবৰ পোহৰলৈ আহিছে । আৰক্ষীয়ে জনোৱা মতে মাওবাদী অধ্যুষিত সুকমাৰ গোগুণ্ডা অঞ্চলত এই সংঘৰ্ষ হয় । আৰক্ষীয়ে জনোৱা মতে এই সংঘৰ্ষত ৩ টা মাওবাদী আহত হৈছে । অঞ্চলটো ঘেৰাও কৰি নিৰাপত্তা বাহিনীয়ে অভিযান অব্যাহত ৰাখিছে ।
সুকমাৰ আৰক্ষী অধীক্ষকে জনোৱা মতে সুকমা ডিআৰজি, দান্তেৱাড়া ডিআৰজি, চিআৰপিএফ দ্বিতীয় বেটেলিয়ন আৰু চিআৰপিএফ ১১১ বেটেলিয়নৰ এক যুটীয়া দলে গোগুণ্ডা অঞ্চলত অভিযান চলাই আছিল । সেই সময়তে অৰণ্যত লুকাই থকা মাওবাদীয়ে দলটোক আক্ৰমণ কৰে । আনহাতে ইয়াৰ প্ৰত্যুত্তৰত নিৰাপত্তা বাহিনীয়েও গুলীচালনা কৰে । নিৰাপত্তা বাহিনীৰ গুলীত ৩ মাওবাদী আহত হয় । ইয়াৰ পাছতে মাওবাদীকেইটা ঘটনাস্থলীৰ পৰা পলায়ন কৰে । জানিব পৰা মতে আঘাতপ্ৰাপ্ত মাওবাদীসকলক আটক কৰাৰ বাবে নিৰাপত্তা বাহিনীয়ে অৰণ্যত কটকটীয়া তালাচী চলাই আছে ।