18 জুনত ক’ভিড যোদ্ধাৰ বাবে ‘Crash Course’ মুকলি কৰিব প্ৰধানমন্ত্ৰীয়ে

সমগ্ৰ দেশৰ এক লাখ ক’ভিড যোদ্ধা (Covid Warriors)ৰ দক্ষতা বৃদ্ধিৰ লক্ষ্যৰে আগন্তুক 18 জুনৰ পৰা 'Customized Crash Course'ৰ আৰম্ভ কৰিব প্ৰধানমন্ত্ৰী নৰেন্দ্ৰ মোদীয়ে ৷ ভিডিঅ’ কনফাৰেন্সযোগে এই পাঠক্ৰম মুকলি কৰিব প্ৰধানমন্ত্ৰীগৰাকীয়ে ৷

নেশ্যনেল ডেস্ক, 16 জুন : আগন্তুক 18 জুনত দেশৰ ক’ভিড ফ্ৰণ্টলাইন কৰ্মী (Covid Frontline Workers) সকলৰ বাবে 'Customized Crash Course' মুকলি কৰিব প্ৰধানমন্ত্ৰী নৰেন্দ্ৰ মোদীয়ে ৷ দিনৰ 11 বজাত ভিডিঅ’ কনফাৰেন্সযোগে প্ৰধানমন্ত্ৰীয়ে দেশৰ 26 খন ৰাজ্যত মুঠ 111 টা প্ৰশিক্ষণ কেন্দ্ৰ মুকলি কৰিব বুলি জানিব পৰা গৈছে ৷

এই কাৰ্যসূচীৰ লক্ষ্য হৈছে সমগ্ৰ দেশৰ এক লাখ ক’ভিড যোদ্ধা (Covid Warriors)ৰ দক্ষতা বৃদ্ধি কৰা । উক্ত প্ৰশিক্ষণটো 6 টা অনুকূলিত চাকৰিৰ ভূমিকাত প্ৰদান কৰা হ’ব ৷ সেইকেইটা হৈছে- ‘Home Care Support’, ‘Basic Care Support’, ‘Advanced Care Support’, ‘Emergency Care Support’, ‘Sample Collection Support’ আৰু ‘Medical Equipment Support’ ৷

উল্লেখ্য যে, প্ৰধানমন্ত্ৰী কৌশল বিকাশ যোজনা (Pradhan Mantri Kaushal Vikas Yojana)3.0ৰ কেন্দ্ৰীয় উপাদান(Central Component)ৰ অধীনত এক বিশেষ কাৰ্যসূচী হিচাপে প্ৰস্তুত কৰা হৈছে এই কাৰ্যসূচী ৷ ইয়াৰ মুঠ বিত্তীয় ব্যয় হৈছে 276 কোটি টকা । এই কাৰ্যসূচীয়ে স্বাস্থ্যখণ্ডত জনশক্তিৰ বৰ্তমান আৰু ভৱিষ্যতৰ প্ৰয়োজনীয়তা পূৰণ কৰাৰ বাবে দক্ষ অ-চিকিৎসা স্বাস্থ্য সেৱা-কৰ্মী গঢ়ি তুলিব ।

লগতে পঢ়ক :পৰ্যটকৰ বাবে পুনৰ মুকলি কৰা হ'ল তাজমহল