নেশ্যনেল ডেস্ক,২২ জুলাই :ফোন বেংকিং কেলেংকাৰীক লৈ বিৰোধীক আক্ৰমণ প্ৰধানমন্ত্ৰী নৰেন্দ্ৰ মোডীৰ । প্ৰধানমন্ত্ৰী মোডীৰ মতে পূৰ্বৰ চৰকাৰৰ দিনত বেংকিং সেৱা কেলেংকাৰী সংঘটিত হৈছিল, যাৰ বাবে দেশৰ বেংকিং ব্যৱস্থা জুৰুলা হৈ পৰিছিল । ৰোজগাৰ মেলাত অংশগ্ৰহণ কৰি প্ৰধানমন্ত্ৰীয়ে এনেদৰে বিৰোধীক সমালোচনা কৰে ।
উল্লেখ্য যে শনিবাৰে দেশৰ প্ৰায় ৭০ হাজাৰ যুৱক-যুৱতীৰ মাজত নিযুক্তি পত্ৰ বিতৰণ কৰা হয় । প্ৰধানমন্ত্ৰী নৰেন্দ্ৰ মোডীয়ে ভিডিঅ' কনফাৰেন্সৰ জৰিয়তে নিযুক্তি পত্ৰ বিতৰণ কৰে । সমগ্ৰ দেশৰে ৪৪ টাতকৈও অধিক স্থানত ৰোজগাৰ মেলাৰ আয়োজন কৰা হয় । এই মেলাত অংশগ্ৰহণকাৰীসকলক প্ৰধানমন্ত্ৰীয়ে সম্বোধন কৰে আৰু ভাষণৰ সময়ত বিৰোধীক সমালোচনা কৰে ।
লক্ষণীয়ভাৱে বেছি সংখ্যকেই বেংকিং খণ্ডত নিযুক্তি লাভ কৰিছে । যাৰ বাবে অনুষ্ঠানত ভাষণ প্ৰদান কৰি প্ৰধানমন্ত্ৰী মোডীয়ে কয় যে ৰাজহুৱা বেংকসমূহ পূৰ্বে হাজাৰ হাজাৰ কোটি টকাৰ লোকচান আৰু এনপিএৰ বাবে জনাজাত আছিল আৰু এতিয়া সেইবোৰৰ অভিলেখ সংখ্যক লাভ হৈছে । 'ফোন বেংকিং' কেলেংকাৰী পূৰ্বৰ চৰকাৰৰ আটাইতকৈ ডাঙৰ কেলেংকাৰী আছিল বুলি প্ৰধানমন্ত্ৰীয়ে অভিযোগ কৰে ।