নেশ্যনেল ডেস্ক,১৮ জানুৱাৰী :অযোধ্যাৰ নৱনিৰ্মিত ৰাম মন্দিৰ মুকলিক লৈ দেশজুৰি ব্যাপক উছাহ দেখিবলৈ পোৱা গৈছে । ৰাম মন্দিৰৰ অভিষেক অনুষ্ঠানলৈ মাজত মাত্ৰ ৩ দিন বাকী আছে । ইতিমধ্যে অযোধ্যাত বিভিন্ন কাৰ্যসূচী আৰম্ভ হৈছে । তাৰ প্ৰাকক্ষণত প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে ৰাম মন্দিৰ স্মাৰক ডাক টিকট আৰু বিশ্বজুৰি ভগৱান ৰামৰ ওপৰত জাৰি কৰা ডাক টিকটৰ এখন গ্ৰন্থ মুকলি কৰে ।
বিষয়াসকলে জনোৱা মতে ডাক টিকটত থকা উপাদানবোৰৰ ভিতৰত আছে ৰাম মন্দিৰ, চৌপাই 'মঙ্গল ভৱন অমঙ্গল হৰি', সূৰ্য, সৰয়ু নদী আৰু মন্দিৰৰ আশে-পাশে থকা ভাস্কৰ্যসমূহ । বিষয়াসকলৰ মতে ৬ টা ডাক টিকট হৈছে ৰাম মন্দিৰ, ভগৱান গণেশ, ভগৱান হনুমান, জটায়ু, কেৱতৰাজ আৰু মা সাৱৰী আছে ।
ডাক টিকটৰ গ্ৰন্থখন হৈছে ভগৱান ৰামৰ আন্তৰ্জাতিক আবেদন প্ৰদৰ্শন কৰাৰ এক প্ৰয়াস আৰু ৪৮ পৃষ্ঠাৰ গ্ৰন্থখনত আমেৰিকা, নিউজীলেণ্ড, ছিংগাপুৰ, কানাডা, কম্বোডিয়া আৰু ৰাষ্ট্ৰসংঘৰ দৰে সংগঠনকে ধৰি ২০ খনতকৈও অধিক দেশৰ দ্বাৰা জাৰী কৰা ডাক টিকট সামৰি লোৱা হৈছে ।