নেচনেল ডেস্ক,20 মে': টাউতেৰ সংহাৰত ক্ষতিগ্ৰস্ত গুজৰাটলৈ তাৎক্ষণিক সাহায্য হিচাপে 1000 কোটি টকাৰ অনুমোদন জনাইছে প্ৰধানমন্ত্ৰী নৰেন্দ্ৰ মোডীয়ে ৷ এক বিভাগীয় বিবৃতিযোগে জানিবলৈ দিয়া মতে, আকাশমাৰ্গেৰে টাউতেত ক্ষতিগ্ৰস্ত ৰাজ্যখন পৰ্যবেক্ষণ কৰাৰ পাচতে প্ৰধানমন্ত্ৰী গৰাকীয়ে এই সাহায্যৰ অনুমোদন জনায় ৷ ঘূৰ্ণী বতাহৰ ফলত নিহতসকলৰ আত্মীয়ৰ বাবেও প্ৰধানমন্ত্ৰী গৰাকীয়ে 2 লাখ টকাৰ ক্ষতিপূৰণ ঘোষণা কৰে ৷
প্ৰেছ ইনফৰমেশ্যন ব্যুৰ' (পিআইবি) ৰ এক বিজ্ঞপ্তিত এই কথাও কোৱা হৈছে যে, সংশ্লিষ্ট ৰাজ্যসমূহে কেন্দ্ৰৰ সৈতে ধুমুহাত ক্ষয়-ক্ষতিৰ পৰ্যালোচনা কৰাৰ পাচত অন্যান্য প্ৰভাৱিত ৰাজ্যসমূহলৈও তাৎক্ষণিক বিত্তীয় সাহায্য প্ৰদান কৰা হ'ব ৷ গুজৰাটৰ মুখ্যমন্ত্ৰী বিজয় ৰূপানী আৰু অন্যান্য শীৰ্ষ বিষয়াসকলৰ সৈতে এক পৰ্যালোচনা বৈঠকত অংশ লোৱাৰ পাচত প্ৰধানমন্ত্ৰী গৰাকীয়ে এই ঘোষণা কৰে ৷
ঘূৰ্ণী বতাহত ক্ষতিগ্ৰস্ত কেৰালা, কৰ্ণাটক, গোৱা, মহাৰাষ্ট্ৰ, গুজৰাট, ৰাজস্থানৰ লগতে দমন-দিউ আৰু দাদৰা-নগৰ হাভেলী কেন্দ্ৰীয় শাসিত অঞ্চলৰ নিহতসকলৰ আত্মীয়লৈ 2 লাখ টকাৰ ক্ষতিপূৰণ ঘোষণা কৰাৰ লগতে গুৰুতৰভাৱে আঘাতপ্ৰাপ্ত সকললৈ 50,000 টকাৰ সাহায্য ঘোষণা কৰা হৈছে ৷