নিৰ্বাচনৰ পূৰ্বে জম্মু-কাশ্মীৰক ৰাজ্যৰ মৰ্যাদা দিয়ক : চিদাম্বৰম

জম্মু-কাশ্মীৰ(JAMMU-KASHMIR)ক ৰাজ্যৰ মৰ্যাদা দিয়া বিষয়ক লৈ নৰেন্দ্ৰ মোডী(NARENDRA MODI) নেতৃত্বাধীন কেন্দ্ৰীয় চৰকাৰক তীব্ৰ সমালোচনা কৰিলে প্ৰাক্তন গৃহ মন্ত্ৰী পি চিদাম্বৰমে । শুকুৰবাৰে তেওঁ কয় যে, কংগ্ৰেছ আৰু জম্মু-কাশ্মীৰৰ অন্যান্য ৰাজনৈতিক দলসমূহে প্ৰথমে ৰাজ্যৰ মৰ্যাদা বিচাৰে আৰু তাৰ পিছত নিৰ্বাচন অনুষ্ঠিত হোৱাতো বিচাৰিছে ।

নেশ্যনেল ডেস্ক, ২৫ জুন : জম্মু-কাশ্মীৰক পূৰ্ণ ৰাজ্যৰ মৰ্যাদা প্ৰদানক লৈ প্ৰতিক্ৰিয়া প্ৰকাশ কৰিছে জ্যেষ্ঠ কংগ্ৰেছ নেতা তথা প্ৰাক্তন গৃহ মন্ত্ৰী পি চিদাম্বৰমে । কেন্দ্ৰীয় চৰকাৰে প্ৰথমে জম্মু-কাশ্মীৰত নিৰ্বাচন অনুষ্ঠিত কৰিব বিচৰা আৰু পিছত ৰাজ্যৰ মৰ্যাদা প্ৰদান কৰিব বিচৰা কাৰ্যক উদ্ভট আখ্যা দিয়ে জ্যেষ্ঠ কংগ্ৰেছ নেতাগৰাকীয়ে । এই সন্দৰ্ভত শুকুৰবাৰে তেওঁ কয় যে, কংগ্ৰেছ আৰু জম্মু আৰু কাশ্মীৰৰ অন্যান্য দলে প্ৰথমে ৰাজ্যৰ মৰ্যাদা বিচাৰে আৰু তাৰ পিছত নিৰ্বাচন অনুষ্ঠিত হোৱাতো বিচাৰিছে ।

টুইটযোগে প্ৰতিক্ৰিয়া কৰি তেওঁ উল্লেখ কৰে যে, চৰকাৰৰ উদ্দেশ্য হৈছে প্ৰথমে নিৰ্বাচন অনুষ্ঠিত কৰা আৰু পিছত জম্মু-কাশ্মীৰক ৰাজ্যৰ মৰ্যাদা প্ৰদান কৰা । তেওঁৰ মতে, জম্মু আৰু কাশ্মীৰৰ পূৰ্ণ ৰাজ্যৰ মৰ্যাদা পুনৰুদ্ধাৰ হোৱাৰ পিছত নিৰ্বাচন অনুষ্ঠিত হওক । ৰাজ্যই নিৰ্বাচন অনুষ্ঠিত কৰিবই লাগিব আৰু তেনে নিৰ্বাচনহে নিৰপেক্ষ হ'ব ।

জম্মু-কাশ্মীৰক ৰাজ্যৰ মৰ্যাদা প্ৰদানক লৈ প্ৰতিক্ৰিয়া পি চিদাম্বৰমৰ

উদাহৰণ দাঙি ধৰি তেওঁ উল্লেখ কৰে যে, সাধাৰণতে ঘোঁৰাগাড়ী ঘোঁৰাটোৱে টানে অৰ্থাৎ ঘোঁৰাটো আগফালে থাকে । কিন্তু ইয়াত চৰকাৰে সন্মুখত গাড়ীখন ৰাখিছে আৰু পিছফালে ঘোঁৰাটো ৰাখিব বিচাৰিছে ।

চৰকাৰে এনে উদ্ভট কাণ্ড কিয় কৰিব বিচাৰিছে বুলিও তেওঁ প্ৰশ্ন উত্থাপন কৰে । জম্মু-কাশ্মীৰক দুখন কেন্দ্ৰীয় শাসিত ৰাজ্য হিচাপে বিভক্ত কৰা আৰু বিশেষ মৰ্যাদা প্ৰত্যাহাৰ কৰাৰ প্ৰায় দুবছৰ পিছত প্ৰধানমন্ত্ৰী নৰেন্দ্ৰ মোডীয়ে বৃহস্পতিবাৰে পূৰ্বৰ ৰাজ্যখনৰ শীৰ্ষ ৰাজনৈতিক নেতাসকলৰ সৈতে আলোচনাত মিলিত হয় । এই বৈঠকত তেওঁ কয় যে, কেন্দ্ৰৰ মূল উদ্দেশ্য হৈছে বৰ্তমান জম্মু-কাশ্মীৰত তৃণমূল পৰ্যায়ৰ পৰা গণতন্ত্ৰ শক্তিশালী কৰা আৰু নিৰ্বাচন অনুষ্ঠিত কৰিব পৰা পৰিৱেশ গঢ়ি তোলা ।

উল্লেখ্য যে, এই বৈঠকত কেন্দ্ৰীয় গৃহ মন্ত্ৰীগৰাকীয়ে সীমা নিৰ্ধাৰণ বিষয়টো উত্থাপন কৰে । কিন্তু জম্মু-কাশ্মীৰৰ প্ৰাক্তন মুখ্যমন্ত্ৰী ওমৰ আব্দুল্লাই ইয়াৰ বিৰোধিতা কৰে ৷ সৰ্বদলীয় বৈঠকৰ পিছত প্ৰধানমন্ত্ৰী নৰেন্দ্ৰ মোডীয়ে টুইটযোগেও এই বিষয়ত প্ৰতিক্ৰিয়া ব্যক্ত কৰিছিল ।

লগতে পঢ়ক:কাশ্মীৰৰ সীমানিৰ্ধাৰণ: এনডিএ চৰকাৰ আৰু আঞ্চলিক দলসমূহৰ বাবে এক কাঁইটীয়া বিষয়