Arvind Kejriwal on BJP : বিজেপিক উৎখাত কৰাটো দেশপ্ৰেমৰ আটাইতকৈ ডাঙৰ কাৰ্য

দিল্লীৰ মুখ্যমন্ত্ৰী অৰবিন্দ কেজৰিৱালে বিজেপিক দুটা কাৰ্যকালৰ বাবে শাসনত থকা সত্ত্বেও দেশক প্ৰগতিৰ দিশে আগুৱাই নিয়াত ব্যৰ্থ হোৱাৰ অভিযোগ উত্থাপন কৰিছে । তেওঁ দাবী কৰিছে যে যদিও আন দলৰ ৰাজনীতিবিদসকলক প্ৰায়ে গুণ্ডামি কৰা দেখা যায়, কিন্তু আপৰ ৰাজনীতিবিদসকলক ৰাইজে পছন্দ কৰে, কাৰণ তেওঁলোক নম্ৰ। "এয়া হৈছে আপৰ ট্ৰেডমাৰ্ক ।" কেজৰিৱালে কয় ।

নিউজ ডেস্ক, ২৩ অক্টোবৰ : দিল্লীৰ মুখ্যমন্ত্ৰী অৰবিন্দ কেজৰিৱালে দেওবাৰে কয় যে ২০২৪ চনৰ লোকসভা নিৰ্বাচনত ভাৰতীয় জনতা পাৰ্টীক ক্ষমতাৰ পৰা আঁতৰোৱাটো 'দেশপ্ৰেমৰ সৰ্বশ্ৰেষ্ঠ কাৰ্য' হ'ব । দুটা কাৰ্যকালৰ বাবে শাসনত থকা সত্ত্বেও বিজেপিয়ে দেশক প্ৰগতিৰ দিশে আগুৱাই নিয়াত ব্যৰ্থ হোৱাৰ অভিযোগ উত্থাপন কৰি কেজৰিৱালে এনেদৰে কয় । আপৰ ৰাষ্ট্ৰীয় আহ্বায়কগৰাকীয়ে তেওঁৰ নিৰ্বাচনী সমষ্টি নতুন দিল্লীত দলীয় স্বেচ্ছাসেৱকসকলক সম্বোধন কৰি এই মন্তব্য কৰে ।

"মোৰ সমষ্টিৰ লোকসকলে স্বেচ্ছাসেৱকসকলক প্ৰশংসা কৰে । আপৰ স্বেচ্ছাসেৱকসকল কোনো ৰাজনৈতিক পটভূমিৰ পৰা অহা নাই । আমাৰ দলটো ৰাজনৈতিক পটভূমি থকা দল নহয় । আনকি আপৰ জ্যেষ্ঠ নেতাসকলো ৰাজনৈতিক পটভূমিৰ পৰা অহা নাই । ইয়াৰে ভিতৰত আছোঁ মই আৰু মনীষ ছিছোডিয়াও । আমি সকলো 'আম আদমী' ।" কেজৰিৱালে কয় । তেওঁ লগতে দাবী কৰে যে যদিও আন দলৰ ৰাজনীতিবিদসকলক প্ৰায়ে গুণ্ডামি কৰা দেখা যায়, কিন্তু আপৰ ৰাজনীতিবিদসকলক ৰাইজে পছন্দ কৰে । কাৰণ তেওঁলোক নম্ৰ । "এয়া হৈছে আপৰ ট্ৰেডমাৰ্ক ।" কেজৰিৱালে লগতে সংযোগ কৰে ।

কেজৰিৱালে কয় যে বিজেপিয়ে পূৰ্ণ সংখ্যাগৰিষ্ঠতাৰে দ্বিতীয়বাৰৰ বাবে শাসনলৈ অহাৰ পিছত দেশখনক প্ৰগতিৰ এক পথত নেতৃত্ব দিব পাৰিলেহেঁতেন, কিন্তু সেয়া নহ'ল । "... আজি আমি দেখিছোঁ যে দেশৰ পৰিৱেশৰ সকলো ফালে অৱনতি হৈছে । ... সমাজত এনে তীব্ৰ মেৰুকৰণ কেতিয়াও দেখা পোৱা ন'গৈছিল । ইমান যুঁজ, হিংসা, দুৰ্নীতি আৰু লুণ্ঠন আগতে কেতিয়াও দেখা পোৱা ন'গৈছিল । ক'তো শান্তি নাই ।" তেওঁ কয় ।

আনহাতে, ২০২৪ চনত বিজেপিক ক্ষমতাৰ পৰা আঁতৰোৱাটো দেশপ্ৰেমৰ আটাইতকৈ ডাঙৰ কাৰ্য হ'ব বুলি তেওঁ কয় । "তেতিয়াহে দেশখন আগবাঢ়িব । তেওঁলোকে লোৱা সিদ্ধান্তসমূহ কোনেও বুজি নাপায় যে তেওঁলোকে সেইবোৰ কিয় লৈছে ।" তেওঁ কয় । ২০১৬ চনত বিমুদ্ৰাকৰণৰ বাবে ভাৰতৰ অৰ্থনীতি কমেও ১০ বছৰ পিছপৰি গৈছে বুলিও দাবী কেজৰিৱালৰ । কেজৰিৱালে লগতে দাবী কৰে যে মানুহৰ চাকৰি, ব্যৱসায় আৰু কাৰখানা বন্ধ হৈ গৈছে ।

লগতে পঢ়ক :Crimes against women : "ভগ্নী আৰু কন্যাসকলৰ সৈতে দুৰ্ব্যৱহাৰ কৰা লোকক ফাঁচী দিয়া হ’ব": শিৱৰাজ সিং চৌহান