নেশ্যনেল ডেস্ক,২৮ এপ্ৰিল :'অপাৰেশ্যন কাবেৰী'ৰ জৰিয়তে ছুডানৰ পৰা ভাৰতীয়সকলক উদ্ধাৰৰ প্ৰচেষ্টা অব্যাহত ৰাখিছে চৰকাৰে (Operation Kaveri in Sudan)। বৃহস্পতিবাৰে আৱদ্ধ ভাৰতীয়ৰ অষ্টমটো দলক লৈ জেদ্দালৈ ৰাওনা হৈছে বায়ু সেনাৰ C-130J বিমান (8th batch of Indian leaves Sudan)। বিমানখনে ছুডানৰ ৱাদি চিডনা বিমান ঘাটিৰ পৰা জেদ্দালৈ উৰা মাৰিছে । অষ্টমটো দলত প্ৰায় ১২১ গৰাকী লোক আছে বুলি জানিব পৰা গৈছে । বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে টুইটযোগে এই কথা প্ৰকাশ কৰিছে ।
ইয়াৰ পূৰ্বে, বৃহস্পতিবাৰে কেন্দ্ৰীয় বৈদেশিক পৰিক্ৰমা ৰাজ্যিক মন্ত্ৰী ভি মুৰলীধৰণে 'অপাৰেশ্যন কাবেৰী'ৰ অধীনত জেদ্দাৰ বন্দৰত ছুডানৰ পৰা উদ্ধাৰ কৰা ভাৰতীয়সকলক আদৰণি জনাইছিল । সেই সময়ত ছুডানৰ পৰা জেদ্দাত অৱতৰণ কৰা আইএএফ চি-১৩০জে বিমানখনত মুঠ ১৩৫ গৰাকী যাত্ৰী আছিল (Indian evacuation from Sudan)।
ছুডানৰ পৰা আৱদ্ধ ভাৰতীয় নাগৰিকসকলক স্থানান্তৰ কৰাৰ বিষয়ে অৱগত কৰি বৈদেশিক মন্ত্ৰালয়ৰ মুখপাত্ৰ অৰিন্দম বাগচীয়ে বৃহস্পতিবাৰে টুইট কৰি কয় যে ভাৰতীয়সকল বিমানেৰে জেদ্দালৈ ৰাওনা হৈছে । আৱদ্ধ ভাৰতীয়সকলৰ ৭ম দলটো ছুডানৰ পৰা প্ৰস্থান কৰিছে । আইএএফচি-১৩০জে বিমানত থকা সপ্তম দলটোত আছিল ১৩৫ গৰাকী ভাৰতীয় ।