Nashik Onion Wholesale Markets Protest : নাছিকৰ পিঁয়াজ কেতিয়াকৈ খাবলৈ পায় ঠিক নাই !

পিঁয়াজৰ ব্যৱসায়ীসকলে দাবী কৰিছে যে কেন্দ্ৰীয় চৰকাৰে চলিত বৰ্ষৰ ৩১ ডিচেম্বৰলৈকে পিয়াঁজ ৰপ্তানিৰ ওপৰত ৪০ শতাংশ শুল্ক আৰোপ কৰাৰ সিদ্ধান্তই পিয়াঁজ খেতিয়ক আৰু ইয়াৰ ৰপ্তানিত বিৰূপ প্ৰভাৱ পেলাব ।

নিউজ ডেস্ক, ২২ আগষ্ট : সোমবাৰে পিয়াঁজ ব্যৱসায়ীসকলে কয় যে, তেওঁলোকে মহাৰাষ্ট্ৰৰ নাছিক জিলাৰ সকলো কৃষি উৎপাদন বজাৰ সমিতিত (Agriculture Produce Market Committees, APMCs) অনিৰ্দিষ্টকালৰ বাবে পিয়াঁজৰ নিলাম বন্ধ কৰাৰ সিদ্ধান্ত লৈছে । তেওঁলোকে কেন্দ্ৰই পাকঘৰৰ মুখ্য পাচলিবিধৰ ৰপ্তানিৰ ওপৰত ৪০ শতাংশ শুল্ক আৰোপ কৰাৰ সিদ্ধান্তৰ বিৰুদ্ধে প্ৰতিবাদ জনাই এই সিদ্ধান্ত গ্ৰহণ কৰা বুলি জনাইছে ।

এই সিদ্ধান্তৰ পৰিপ্ৰেক্ষিতত, সোমবাৰে জিলাখনৰ বেছিভাগ এপিএমচিত পিয়াঁজৰ নিলাম বন্ধ থাকে । ইয়াৰ ভিতৰত আছে ভাৰতৰ সৰ্ববৃহৎ পাইকাৰী পিয়াঁজ বজাৰ লাচালগাঁও । সূত্ৰত এই কথা প্ৰকাশ । ব্যৱসায়ীসকলে দাবী কৰিছে যে কেন্দ্ৰীয় চৰকাৰে চলিত বৰ্ষৰ ৩১ ডিচেম্বৰলৈকে পিয়াঁজ ৰপ্তানিৰ ওপৰত ৪০ শতাংশ শুল্ক আৰোপ কৰাৰ সিদ্ধান্তই পিয়াঁজ খেতিয়ক আৰু ইয়াৰ ৰপ্তানিত বিৰূপ প্ৰভাৱ পেলাব । সন্থাটোৰ সভাপতি খাণ্ডু দেওৰে সোমবাৰে কয় যে নাছিকত পিয়াঁজৰ নিলাম অনিৰ্দিষ্টকালৰ বাবে বন্ধ কৰাৰ সিদ্ধান্ত দেওবাৰে নাছিক জিলা পিয়াঁজ ব্যৱসায়ী সন্থাৰ এখন বৈঠকত লোৱা হয় ।

"এই সিদ্ধান্তটো কৃষকসকলৰ ওচৰলৈ যাবলৈ সময় লাগিব । সেয়েহে যদি পিয়াঁজ এপিএমচিলৈ অনা হয়, তেনেহ'লে উক্ত পিয়াঁজবোৰৰ নিলাম অনুষ্ঠিত কৰা হ'ব আৰু তাৰ পিছত প্ৰক্ৰিয়াটো অনিৰ্দিষ্টকালৰ বাবে বন্ধ থাকিব । কৃষকসকলৰ বিভিন্ন সংগঠনৰ অনুৰোধ অনুসৰি বৈঠকত এই সিদ্ধান্তও লোৱা হয় ।" তেওঁ লগতে কয় ।

আনহাতে, সূত্ৰ অনুসৰি, কিছু ঠাইত পিয়াঁজ অনা হৈছে আৰু সেইবোৰৰ নিলাম এপিএমচিত আৰম্ভ হৈছে । চুবুৰীয়া নৱী মুম্বাইৰ বাশী এপিএমচিৰ পিয়াঁজ-আলু বজাৰৰ সভাপতি সঞ্জয় পিংগলে পিয়াঁজৰ ৰপ্তানিৰ ওপৰত ৪০ শতাংশ শুল্ক আৰোপ কৰাৰ সিদ্ধান্তৰ ওপৰত কেন্দ্ৰক পুনৰ বিবেচনা কৰিবলৈ আহ্বান জনায় ।

পিটিআইৰ সৈতে বাৰ্তালাপত পিংগলে দাবী কৰে যে চৰকাৰৰ সিদ্ধান্তই ৰাজ্যখনৰ পিয়াঁজ খেতিয়কসকলৰ ওপৰত বিৰূপ প্ৰভাৱ পেলাব । "আমি কৃষকসকলৰ পৰাও যথেষ্ট চাপত আছোঁ, যিসকলে আমাক বজাৰ বন্ধ কৰিবলৈ আৰু পিয়াঁজৰ বিক্ৰী বন্ধ কৰিবলৈ কৈছে । কমেও ১০-১৫ টা সংগঠনে আমাক পিয়াঁজ বিক্ৰী নকৰিবলৈ কৈছে । সমগ্ৰ নাছিক জিলাই আজি বন্ধ (পিয়াঁজ নিলাম) পালন কৰি আছে । আগন্তুক দিনত স্থানীয় বজাৰবোৰো বন্ধ হ'ব । এপিএমচিয়েও কৃষকসকলক সমৰ্থন কৰাৰ সিদ্ধান্ত লৈছে ।" তেওঁ কয় ।

"যদি আমি চৰকাৰক ৪০ শতাংশ শুল্ক পৰিশোধ কৰোঁ, তেন্তে আমি ২৫ টকাত (প্ৰতিকিলোগ্ৰাম) ৰপ্তানি কৰি থকা পিয়াঁজৰ হাৰ ১৫ টকালৈ হ্ৰাস পাব । এই হাৰত আমি ১০ টকাত পিয়াঁজ ক্ৰয় কৰিবলৈ বাধ্য হ'ম । যাৰ ফলত আনকি এজন কৃষকৰ উৎপাদন ব্যয়ো সামৰি নল'ব ।" পিংগলে কয় । তেওঁ দাবী কৰে যে কিছুমান সংস্থাই কেন্দ্ৰীয় চৰকাৰক বিষয়টোৰ ওপৰত 'ভুল প্ৰতিবেদন' দিছে আৰু পিয়াঁজ উৎপাদনৰ ওপৰত সাৰ, শ্ৰমিক ব্যয় আদিৰ ব্যয় বৃদ্ধিৰ কথা বিবেচনা কৰা হোৱা নাই ।

"আজিও মহাৰাষ্ট্ৰত ৮০ শতাংশ আৰু মধ্যপ্ৰদেশত ৭০ শতাংশ পিয়াঁজৰ মজুত আছে ।" তেওঁ লগতে দাবী কৰে যে কম বৰষুণৰ বাবে মহাৰাষ্ট্ৰ আৰু কৰ্ণাটকত পিয়াঁজৰ ভাল উৎপাদন হৈছে । যদি ১০ বছৰ পূৰ্বে পিয়াঁজৰ মূল্য ১০ টকা (প্ৰতি কিলোগ্ৰাম) আছিল আৰু এতিয়া উৎপাদন ব্যয় ১৭-১৮ টকা বিবেচনা কৰিলে সেয়া বিশেষ বৃদ্ধি হোৱা নাই । পাইকাৰী বজাৰত ই প্ৰায় ২৫-৩০ টকা আৰু খুচুৰা ব্যৱসায়ত ৩৫-৪০ টকা । তেওঁ কয় ।

পিংগলে চৰকাৰক চাউল আৰু ঘেঁহুৰ দৰে ৰাজহুৱা বিতৰণ প্ৰণালীৰ (পিডিএছ) জৰিয়তে পিয়াঁজ যোগান ধৰিবলৈ আহ্বান জনাইছে । তেওঁ কয়, "যদি আপোনালোকে বিচাৰে যে দৰিদ্ৰ লোকসকলে কম মূল্যত পিয়াঁজ পাব লাগে, তেন্তে পিডিএছৰ জৰিয়তে ইয়াক ২-১০ টকাত (প্ৰতি কিলোগ্ৰাম) বিক্ৰী কৰক।"

তেওঁ লগতে দাবী কৰে যে কেন্দ্ৰৰ সিদ্ধান্তৰ ফলত পিয়াঁজৰ ৰপ্তানি যথেষ্ট হ্ৰাস পাব আৰু পাকিস্তান, ইৰাণ আৰু ইজিপ্তৰ কৃষকসকলৰ বাবে অধিক উপাৰ্জনৰ সুবিধা হ'ব । পিংগলে কেন্দ্ৰীয় মন্ত্ৰী নীতিন গাডকাৰীক এই বিষয়টো কেন্দ্ৰৰ ওচৰত উত্থাপন কৰিবলৈও আহ্বান জনাইছে । তেওঁ কয় যে, অনাগত দিনত তেওঁলোকে এই বিষয়ত সিদ্ধান্ত ল'ব । কিয়নো তেওঁলোক কৃষকসকলৰ সৈতে থাকিব বিচাৰে । কেন্দ্ৰই অংশীদাৰসকলৰ এখন বৈঠক আহ্বান কৰা উচিত আৰু তাৰ পিছতহে এই সিদ্ধান্ত কাৰ্যকৰী কৰা উচিত । তেওঁ লগতে কয় ।

লগতে পঢ়ক :Raksha Bandhan 2023: মোদীক ৰাখী বান্ধিবলৈ দিল্লীলৈ আহিছে পাকিস্তান মূলৰ ভগ্নী মহচিন শ্বেইখ