নেশ্যনেল ডেস্ক, 9 মাৰ্চ:ছত্তীশগড়ত পুনৰ নক্সালবাদীৰ আক্ৰমণৰ ঘটনা ৷ ছত্তীশগড়ৰ ধামতাৰ জিলাত এজন লোকক হত্যা নক্সালবাদীৰ ৷ আৰক্ষীৰে হৈ চোৰাংচোৱাগিৰি কৰাৰ সন্দেহত হত্যা নাৰদ মাৰ্কাম নামৰ লোকজনক (Naxals Killed Man in Chhattisgarh) ৷
উল্লেখ্য যে, নক্সালবাদীৰ এটা দলে 7 মাৰ্চত মাৰ্কাম নামৰ লোকজনক নিজা বাসগৃহৰ পৰা লৈ গৈছিল আৰু বুধবাৰে অৰ্থাৎ 8 মাৰ্চত চামেদা-ওড়িশা পথত উদ্ধাৰ কৰা হয় মৃতদেহ ৷ স্থানীয় লোকে মৃতদেহ প্ৰত্যক্ষ কৰাৰ পাচতেই খবৰ দিয়ে আৰক্ষীক ৷ ডিঙি কটা অৱস্থাত আৰক্ষীয়ে উদ্ধাৰ কৰে নাৰদ মাৰ্কামৰ মৃতদেহ ৷
ইফালে, মৃতদেহটোৰ কাষতে আৰক্ষীয়ে উদ্ধাৰ কৰে এখন পত্ৰ ৷ যি পত্ৰত আৰক্ষীৰ হৈ চোৰাংচোৱাগিৰি কৰাৰ বাবে মাৰ্কামক হত্যা কৰা বুলি উল্লেখ কৰিছিল নক্সালবাদী দলটোৱে ৷ মৃতদেহ উদ্ধাৰ কৰাৰ পাচতেই পাৰ্শ্বৱৰ্তী অঞ্চলত অভিযান তীব্ৰতৰ কৰি তুলিছে আৰক্ষী আৰু সেনাবাহিনীয়ে (Operation against Naxalite) ৷
আনহাতে, বৃহস্পতিবাৰে নিৰাপত্তাৰক্ষী আৰু নক্সালবাদীৰ এটা গোটৰ মাজত সংঘটিত হয় গুলীচালনাৰ ঘটনা ৷ ছত্তীশগড়ৰ চুকমা জিলাত সংঘটিত হয় এই সংঘৰ্ষ ৷ অৱশ্যে এই পৰ্যন্ত কোনো লোক হতাহত হোৱাৰ খবৰ লাভ কৰা নাই ৷ প্ৰায় 5 টা নক্সালবাদী আঘাতপ্ৰাপ্ত হোৱা বুলি দাবী কৰিছে আৰক্ষী সূত্ৰই (Police Naxalite encounter) ৷
ইয়াৰ পূৰ্বে ফেব্ৰুৱাৰী মাহত ছত্তীশগড়ৰ চুকমা জিলাত নক্সালবাদীৰ সৈতে সংঘৰ্ষত তিনিজন জিলা ৰিজাৰ্ভ গাৰ্ড (DRD) নিহত হৈছিল । নিহতসকলৰ ভিতৰত আছিল ASI ৰামুৰাম নাগ, সহকাৰী কনিষ্টবল কুঞ্জম যোগা আৰু ভাঞ্জম ভীমা । এই সংঘৰ্ষত কেইবাটাও নক্সালবাদী নিহত হোৱা বুলি দাবী কৰিছিল আৰক্ষীয়ে (Naxalite killed in encounter) ৷
চৰকাৰী সূত্ৰ অনুসৰি, নক্সালবাদী দলটোৱে দৈনিক অভিযানৰ পৰা উভতি অহাৰ সময়ত ৰিজাৰ্ভ গাৰ্ডছৰ ওপৰত গুলীচালনা কৰিছিল । এই আক্ৰমণৰ প্ৰত্যুত্তৰত নিৰাপত্তাৰক্ষীয়েও উগ্ৰপন্থী দলটোৰ ওপৰতো গুলীচালনা কৰে । দুয়োপক্ষৰ মাজত বহু সময় ধৰি হোৱা গুলীয়াগুলীত শ্বহীদ হয় তিনিজন জোৱান ৷ নক্সালবাদীৰ গুলীচালনাৰ উপযুক্ত প্ৰত্যুত্তৰ দি নিৰাপত্তৰক্ষীয়ে কৰা গুলীচালনাত প্ৰায় 7 টা উগ্ৰপন্থী নিহত হোৱা বুলি দাবী কৰিছিল আৰক্ষীয়ে ৷
লগতে পঢ়ক:আৰক্ষীৰ চোৰাংচোৱাৰ সন্দেহত নক্সালে হত্যা কৰিলে নিৰপৰাধী লোকক
