নেশ্যনেল ডেস্ক,১ ছেপ্টেম্বৰ :অহা ১৮-২২ ছেপ্টেম্বৰৰ ভিতৰত সংসদৰ বিশেষ অধিবেশনৰ আহ্বান কৰা হৈছে । কেন্দ্ৰই 'এক ৰাষ্ট্ৰ, এক নিৰ্বাচন'ৰ সম্ভাৱনাৰ বাবে প্ৰাক্তন ৰাষ্ট্ৰপতি ৰামনাথ কোবিন্দৰ নেতৃত্বত এখন সমিতিও গঠন কৰিছে । ইয়াৰ পাছতে কেন্দ্ৰীয় চৰকাৰক তীব্ৰ সমালোচনা কৰে বিৰোধী মিত্ৰজোঁটে । কেন্দ্ৰীয় চৰকাৰৰ এই পদক্ষেপক সমালোচনা কৰি বিৰোধী কংগ্ৰেছে কয় যে ইয়াৰ দ্বাৰা ভাৰতীয় জনতা পাৰ্টিৰ উদ্বেগ প্ৰতিফলিত হৈছে । কংগ্ৰেছৰ মতে ৫ খন ৰাজ্যত হ'বলগীয়া বিধানসভা নিৰ্বাচনত পৰাজিত হোৱাৰ আশংকা কৰিছে বিজেপিয়ে । কংগ্ৰেছৰ মতে 'এক ৰাষ্ট্ৰ, এক নিৰ্বাচন'ৰ ধাৰণাটো প্ৰস্তুত কৰাটো জটিল আৰু কাৰ্যকৰী কৰাটো প্ৰত্যাহ্বানজনক ।
প্ৰাক্তন কেন্দ্ৰীয় গৃহ ৰাজ্যিক মন্ত্ৰী চাকিল আহমেদে ইটিভি ভাৰতক কয় যে বিজেপি চিন্তিত তেওঁলোকে মধ্য প্ৰদেশ, ছত্তীশগড়, ৰাজস্থান, তেলেংগানা আৰু মিজোৰামত অহা বিধানসভা নিৰ্বাচনত পৰাজিত হ'ব পাৰে । যোৱা বছৰ হিমাচল প্ৰদেশ আৰু এই বছৰ কৰ্ণাটকত বিজেপি পৰাজিত হৈছে । তেওঁলোকে আশংকা কৰিছে যে ২০২৪ চনৰ লোকসভা নিৰ্বাচনত ৰাজ্যসমূহত নিৰ্বাচনত পৰাজয়ে বিজেপিৰ ওপৰত নেতিবাচক প্ৰভাৱ পেলাব । সেয়েহে, 'এক ৰাষ্ট্ৰ, এক নিৰ্বাচন'ৰ পদক্ষেপ লৈছে বুলি তেওঁ উদ্বেগ প্ৰকাশ কৰে ।
কংগ্ৰেছ নেতাগৰাকীৰ মতে বিজেপিয়ে ৫ খন বিধানসভা নিৰ্বাচন বা লোকসভাৰ নিৰ্বাচনৰ সময়সূচীৰ সৈতে খেলিমেলি কৰিবলৈ 'এক ৰাষ্ট্ৰ, এক নিৰ্বাচন'ৰ ধাৰণাটো লৈছে ।