নেশ্যনেল ডেস্ক, 21 নৱেম্বৰ : উত্তৰাখণ্ডৰ উত্তৰকাশীত সুৰংগত আৱদ্ধ হৈ থকা লোকসকলক উদ্ধাৰৰ বাবে যুদ্ধংদেহী তৎপৰতাৰে অভিযান চলাই আছে ৷ ইয়াৰ মাজতে উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে সোমবাৰে X ত উল্লেখ কৰে যে, তেওঁলোকে সকলো শ্ৰমিকক সুৰক্ষিতভাৱে উদ্ধাৰ কৰিবৰ বাবে সকলো সম্ভৱ প্ৰচেষ্টা অব্যাহত ৰাখিছে ৷ কৰ্মীসকলক উদ্ধাৰ কৰিবলৈ চলি থকা উদ্ধাৰ অভিযানৰ অংশ হিচাপে ধ্বংসাৱশেষৰ ওপৰেৰে 6 ইঞ্চি ব্যাসৰ পাইপলাইন সফলতাৰে স্থাপন কৰা হৈছে ৷ এই পাইপৰ জৰিয়তে প্ৰয়োজন অনুসৰি খাদ্য সামগ্ৰী, ঔষধ আৰু অন্যান্য সামগ্ৰী সহজে শ্ৰমিকসকললৈ প্ৰেৰণ কৰিব পৰা হ'ব ৷
মুখ্যমন্ত্ৰীগৰাকীয়ে লগতে উল্লেখ কৰে যে, কেন্দ্ৰীয় সংস্থা, ৰাজ্যিক দুৰ্যোগ সঁহাৰি বাহিনী (এছডিআৰএফ) আৰু উদ্ধাৰ অভিযানত নিয়োজিত ৰাজ্যিক প্ৰশাসনৰ দলে অবিৰাম পৰিশ্ৰম কৰি আছে ৷ ইতিমধ্যে আৱদ্ধ শ্ৰমিকসকলৰ বাবে প্ৰথমবাৰ গৰম খিচিৰি প্ৰেৰণ কৰা হৈছে ৷ ইয়াৰ পূৰ্বে আৱদ্ধ হৈ থকা শ্ৰমিকসকলৰ বাবে বাহিৰৰ পৰা কাজুবাদাম, আলমণ্ড, মাকৈৰ লগতে পানীয় প্ৰেৰণ কৰা হৈছিল ৷ পাইপৰ জৰিয়তে অন্য কোনো ধৰণৰ খাদ্য প্ৰেৰণ কৰা সম্ভৱ নোহোৱাৰ বাবে তেওঁলোক জীয়াই থাকিবলৈ শুকান ফল-মূলৰ বাদে অন্য খাদ্য প্ৰেৰণ কৰিব পৰা নাছিল ৷ আৱদ্ধ শ্ৰমিকসকলে শুকান ফল খাই থকাৰ ফলত তেওঁলোকৰ স্বাস্থ্যৰ অৱনতি ঘটাৰ বাতৰি পোহৰলৈ আহিছিল ৷
ইফালে শুকান ফল খাই থকাৰ ফলত বেছি সংখ্যক শ্ৰমিকৰে পেটৰ বিষ আৰু কোষ্ঠ-কাঠিন্যৰ সমস্যাই দেখা দিয়া বুলি তেওঁলোকে অৱগত কৰিছিল ৷ ইয়াৰ পিচতে কোম্পানীটোৱে মুখ্য চিকিৎসা বিষয়া ডাঃ আৰচিএছ পানৱাৰক এই বিষয়ে অৱগত কৰিছিল ৷ তাৰ পিচৰে পৰাই স্বাস্থ্য বিভাগে যিকোনো প্ৰকাৰে গাখীৰ, কণী আৰু খাদ্য ভিতৰলৈ প্ৰেৰণ কৰাৰ ব্যৱস্থা কৰিবলৈ চেষ্টা অব্যাহত ৰাখিছিল ৷